Շնչառությունը գործընթացների համալիր է, որն ապահովում է օրգանիզմի կողմից թթվածնի յուրացումը, նրա օգտագործումը օրգանական նյութերի օքսիդացման և ածխաթթու գազի հեռացման համար: Քիթը շնչառական այն օրգանն է, որով մթնոլորտային օդը թափանցում է թոքեր: Քթի ցանկացած դեֆորմացիա կարող է առաջացնել շնչառության խանգարում, ինչն էլ հետևաբար սկիզբ կդնի այլ հիվանդությունների:
Գյումրիի բժշկական կենտրոնում նշանակված է վիրահատություն` ռեդուկցիոն ռինոսեպտոպլաստիկա բաց եղանակով: Ախտորոշվել է սապատավոր քիթ և քթի հետտրավմատիկ դեֆորմացիա: Նախքան վիրահատությունը մոդելավորվում է քթի արտաքին տեսքը, քննարկվում առանձին մասերի չափերն ու ձևը:
Կիրառում են մի քանի ազատ աճառային աուտոտրանսպլանտանտներ-գրաֆտեր՝ վերցված քթի միջնապատից, շնչառությունը լավացնող գրաֆտեր՝ spreader graft, քթի ծայրը ամրացնող գրաֆտեր, քթի թևանման աճառները ամրացնող գրաֆտեր և այլն:
Այս վիրահատության ժամանակ կիրառվում է շրջած՝ W-աձև տրանսկոլլումելյար կտրվածք, առանձնացվում մաշկամկանային շերտը աճառաոսկրային կմախքից: Հեռացվում է աճառային և ոսկրային սապատը, ապա կատարվում միջնապատի շտկում էքստրակորպորալ եղանակով: Այսինքն՝ ամբողջությամբ հեռացվում է աճառային մասը, օրգանիզմից դուրս կատարվում է շեղ և թեք մասերի շտկում աճառների, կարերի, կտրվածքների օգնությամբ, և հետտեղադրվում ու ֆիքսվում է միջային գծով՝ վերին ծնոտի առաջնային քթային ելունին:
Ապա մեդիալ և լաթերալ օստեոտոմիա եղանակով կատարվում է ոսկրերի կոտրում և համադրում մեր ուզած ձևով: Վերջում կատարվում է քթի ծայրի շտկում՝ ռեզեկցիայի ենթարկելով թևանման աճառները՝ ֆիքսելով իրար և միջնապատին, նույնպես կիրառելով աճառային գրաֆտեր կոլլումելիա և քթի թևերի ամրացման համար:
Վերջում ֆիքսում են միջնապատը, լորձաթաղանթը աճառին ներծծվող կարանյութով և տեղադրում տամպոնները:
Վիրահատությունը կատարում է պլաստիկ վիրաբույժ, Երևանի պետական բժշկական համալսարանի պլաստիկ վիրաբուժության ամբիոնի ասիստենտ, բժշկական գիտությունների թեկնածու Կարեն Արամի Պետրոսյանը:
