Սաուդյան միլիարդատեր արքայազն Ալ-Վալիդ իբն Թալալը թագավորության նավթի նախարար Ալի ալ-Նաիմիին և այլ նախարարների բաց նամակ է ուղարկել, որում անհանգստություն է հայտնել նավթի՝ թագավորության արտահանման հիմնական մթերքի ու երկրի բյուջեի համալրման աղբյուրի պահանջարկի և գնի շարունկավող անկման կապակցությամբ: Այս մասին հայտնում է top.rbc.ru-ն:
Արքայազնը գրում է, որ իրեն զարմացնում են ալ-Նաիմիի մեկնաբանությունները, որը ԶԼՄ-ների հաղորդմամբ՝ նավթի գնի 1 բարելի դիմաց 100 դոլարից նվազելու հետ կապված ռիսկերն անվանել է «չափազանցված»:
«(Թագավորության) 2014թ. բյուջեն 90%-ով կախված է դրանից (նավթից), դա (գնի անկումը) թերագնահատելն ինքնին կործանարար է և չի կարող իր վրա ուշադրություն չհրավիրել»,- գրում է արքայազնը: Եթե երկիրը նախկինի պես 100%-ով կախված լինի նավթի արտահանումից, աղետն անխուսափելի կլինի՝ զգուշացնում է միլիարդատերը:
Brent ապրանքանիշի նավթի արժեքը երեքշաբթի օրը գրեթե հասել է 4 տարում նվազագույն նիշի՝ 88 դոլարից քիչ ավելի՝ 1 բարելի դիմաց:
Իր ուղերձում արքայազնը նաև երկրի իշխանություններին կոչ է արել պայմաններ ստեղծել թագավորությունը միջազգային շուկաների փոփոխականությունից պաշտպանելու համար: Ըստ նրա՝ դրա համար պետք է նվազեցնել տնտեսության կախվածությունը նավթից և բազմազանացնել եկամտի աղբյուրները: «…Անհրաժեշտ է հստակ ռազմավարություն մշակել և անհապաղ սկսել իրականացնել այն»: Արքայազնի խոսքով՝ երկիրը պետք է կրճատի նավթի ներքին սպառումը՝ զուգահեռ միջուկային և արևային էներգետիկայի ծրագրեր իրականացնել:
