Թուրքական Zaman թերթի փոխանցմամբ՝ Թուրքիայի խորհրդարանում վերացվել են 1960 թվականի մայիսի 27-ին իրականացված ռազմական հեղաշրջման վերջին հետքերը:
Խոսքը այդ հեղաշրջման ժամանակ խորհրդարանի հին շենքի մոտ կատարված զինվորականների և զինվորական փոխադրամիջոցների լուսանկարների մասին է, որոնք 1961 թվականին տեղադրվել են խորհրդարանի շենքի միջանցքներում՝ պատերի վրա: Դրանց փոխարեն տեղադրվել են նոր լուսանկարներ, որոնցում շեշտադրումը կատարվել է «ժողովրդավարության» վրա:
Հիշեցնենք, որ ներկայումս Թուրքիայի խորհրդարանը ստեղծել է հատուկ հանձնաժողով, որը դիտարկելու է 1960-ական թվականների սկանդալային գործերը: Պատգամավորները որոշել են արխիվներից դուրս բերել և դիտարկել կախաղան բարձրացված Թուրքիայի վարչապետ Ադնան Մենդերեսի գործը:
Հանձնաժողովի գործունեության նպատակը հայտնի քաղաքական գործչի անվան վերականգնումն ու նրա հետմահու արդարացումն է: Ադնան Մենդերեսին կախաղաղն են բարձրացրել 1960 թվականին իրականացված ռազմական հեղաշրջման հետևանքով: Ադնան Մենդերեսը Թուրքիայի վարչապետ է եղել ուղիղ 10 տարի՝ 1950 թվականի մայիսից մինչև 1960 թվականի մայիսը: Նրա կառավարման տարիներին է Թուրքիան մասնակցել Կորեական պատերազմին և անդամակցել ՆԱՏՕ-ին, ինչպես նաև նրա օրոք՝ 1955 թվականի սեպտեմբերի 6-7- ն են եղել հույների ու հայերի ջարդերը:
Մենդերեսը իսլամական լայն գործունեություն է ծավալել երկրում, ինչը հակասել է Աթաթուրքի հռչակած վեց սկզբունքներից մեկին՝ լաիցիզմին, որը կրոնն անջատում էր պետությունից: Մենդերեսի այդ գործունեությունը, ի վերջո, լցրեց Աթաթուրքի կողմից ավանդված՝ երկրի աշխարհիկ ռեժիմի հիմնական պահապան զինվորականների համբերության բաժակը, որոնք էլ 1960 թվականի մայիսի 27-ին գահընկեց արին նրան:
Ադնան Մենդերեսը կախաղան բարձրացվեց 1961 թվականի սեպտեմբերի 17-ին Մարմարա ծովի Իմրալը կղզում, ուր 1999 թվականից ցմահ ազատազրկում է կրում քուրդ առաջնորդ, PKK-ի հիմնադիր Աբդուլլահ Օջալանը: