Սուրբ Ծննդի երեկոյան անհայտ անձինք ներխուժել են Մեքսիկայի Պլատանար դե լես Օնտիվերոս փոքր բնակավայր և առնվազն 9 մարդու սպանել: Այս մասին հայտնում է RIA Novosti-ն՝ հղում անելով տեղի իշխանություններին:
Ողբերգությունը տեղի է ունեցել հյուսիսարևմտյան Սինալոա նահանգում: Ավտոմեքենաներով մոտ 30 ավազակներ քաղաք են մտել և «Կալաշնիկով» ինքնաձիգներից կրակ բացել հետիոտների և իրենց տներում գտնվողների ուղղությամբ:
Քաղաքի վարչակազմի ղեկավար Խոսե Մադինա Ռիոսը խորին ափսոսանք է հայտնել կատարվածի առնչությամբ:
Ոստիկանությունը չի բացառում, որ զոհերի թիվը կարող է աճել: Այժմ զոհերի դիակները գտնվում են քաղաքի տարբեր մասերում: Աշխատանքներում ներգրավված են բանակային ստորաբաժանումները: Զինվորականներն ուսումնասիրում են յուրաքանչյուր տուն:
Ականատեսները հաստատում են, որ հարձակվողները ինչ-որ ցուցակ են ունեցել և սպանություններն իրականացրել են ոչ թե պատահաբար, այլ ուղղորդվել են այդ ցուցակով:
Քաղաքային իշխանությունները մտադիր են նահանգապետին կոչ անել արտակարգ միջոցառումներ ձեռնարկել, քանի որ շատ տեղացիներ վախեցած են և մտադիր են շտապ լքել բնակավայրը:
