Այս ժամերին Սիրիայի տարբեր քաղաքներում տեղի են ունենում բազմամարդ ցույցեր, որտեղ մարդիկ իրենց աջակցությունն են հայտնում գործող ռեժիմին։ Ցույցերը կազմակերպվել են իշխանությունների կողմից: Նախօրեին էլ Ալ-Ասադի նկարներով պաստառները ձեռքներին հազարավոր հայեր անցել են Հալեպ քաղաքի փողոցներով` իրենց աջակցությունը հայտնելով գործող իշխանություններին և անձամբ Բաշար Ալ-Ասադին: Այս մասին հաղորդում է SANA գործակալությունը:
Անհրաժեշտ է նշել, որ հայերը Եգիպտոսում էլ էին հեղափոխության օրերին գործող ռեժիմին և նախագահ Մուբարաքին աջակցություն հայտնում, սակայն մի քանի օր անց Մուբարաքը հեռացավ: Ակնհայտ է, որ մերձավորարևելյան երկրներում տեղի հայերը միշտ էլ ցուցաբերել են լոյալություն գործող ռեժիմների նկատմամբ, և ընդդիմադիր շարժումները միշտ խորթ են եղել նրանց համար:
Սիրիայի բոլոր մեծ քաղաքներում փողոցներով շրջում են տեղի հատուկ ծառայությունների` մուխաբարաթի ներկայացուցիչները, որոնք կանխում են ցանկացած տիպի բողոքի ակցիաները: Իսկ ծովափնյա Լաթակիա քաղաք, որտեղ նախօրեին սպանվել էր 12 ցուցարար, մտցվել է ծանր զինտեխնիկա: Ակնկալվում է, որ առաջիկա ժամերին Բաշար Ալ-Ասադը կցրի կառավարությունը: