Քիչ առաջ ավարտվել է Դաշնակցություն կուսակցության արտահերթ Գերագույն ժողովը, որը մեկնարկել էր առավոտյան: ՀՅԴ-ն այդ ժողովում պետք է որոշում կայացներ, թե 2013թ. նախագահական ընտրություններին ինչ ձևաչափով է մասնակցելու:
«Առաջին լրատվական»-ի հետ զրույցում ՀՅԴ խորհրդարանական խմբակցության քարտուղար Աղվան Վարդանյանն ասաց, որ նախագահական ընտրությունների մասնակցության հետ կապված Գերագույն ժողովում որոշում ընդունվել է, բայց այդ մասին հանրությանը կտեղեկացնեն վաղը հրավիրվող մամլո ասուլիսի ժամանակ:
Հիշեցնենք, որ ՀՅԴ-ն շաբաթներ առաջ 7 կետից բաղկացած պլատֆորմ էր հրապարակել և հայտարարել` որ ուժը կամ որ թեկնածուն ընդունի այդ պայմանները և դրանք կատարելու երաշխիքներ տա, միգուցե նրան էլ պաշտպանեն, եթե, իհարկե, իրենք թեկնածու չառաջադրեն: Բայց միաժամանակ ՀՅԴ անդամները հայտարարում էին, թե իրենց կետերը լավագույնս կարող են իրենք կատարել, և չէին բացառում, որ սեփական թեկնածու կառաջադրեն:
Ի դեպ, վերջերս ՀՅԴ Բյուրոյի ներկայացուցիչ Հրանտ Մարգարյանը և ՀՅԴ ԳՄ ներկայացուցիչ Արմեն Ռուստամյյանը հանդիպել էին նախագահ Սերժ Սարգսյանի հետ և քննարկել իրենց պլատֆորմը: Նրանք հետո հայտարարեցին, որ Ս. Սարգսյանը չի ընդունել իրենց պլատֆորմի 2 կետերը: Ավելի ուշ մամուլում հրապարակում եղավ, որ ՀՅԴ-ն միգուցե թեկնածու առաջադրի, և կառաջադրի թերևս որևէ ընտրություններում չառաջադրված անդամի: Տվյալ դեպքում խոսքը Ա. Ռուստամյանի մասին էր:
Հիշեցնենք նաև, որ Ա. Ռուստամյանը առաջին գործիչն էր, ով մոտ երկու ամիս առաջ հայտարարել էր, թե կարելի է քննարկել նաև նախագահական ընտրությունները բոյկոտելու տարբերակը:
Ավելի ուշ նախագահական ընտրություններին չմասնակցելու մասին հայտարարեց խորհրդարանական երկրորդ խոշոր կուսակցությունը՝ «Բարգավաճ Հայաստանը»: Այսօր իր չառաջադրվելու մասին հայտարարեց նաև ՀԱԿ առաջնորդ Լևոն Տեր-Պետրոսյանը: Չի բացառվում, որ վաղը ՀՅԴ-ն նույնպես հայտարարի ընտրություններին չմասնակցելու մասին: Եվ կստացվի, որ քաղաքական դաշտի մի քանի հիմնական ուժեր բոյկոտում են 2013թ. նախագահական ընտրությունները: