Ալյասկայի համալսարանից կենսաբանության պրոֆեսորը պարզել է Սանտա Կլաուսին նվերները բաժանելիս օգնող եղջերուների կենսաբանական տեսակը: Գիտնականն իր եզրակացությունները շարադրել է փոքրիկ հոդվածում, որը թողարկվել է Physiological and Biochemical Zoology journal պարբերականի կայքում:
Եղջերուներին և նրանց մոտ հարազատներին ուսւոմնասիրած Փերրի Բարբոզայի կարծիքով՝ Դեշերը, Դենսերը, Պրենսերը, Վիքսենը, Քոմեթը, Քյուփիդը, Դոնները, Բլիտցենը և Ռուդոլֆը կարիբուներ են՝ ամերիկյան հյուսիսային եղջերուներ: Սանտայի եղջերուները երիտասարդ են, և նրանց համամասնություններն ու մարմինները օգնում են ավելի արագ շարժվել, քան նրանց ավագ ցեղակիցները:
Բարբոզան նշել է, որ Սանտային օգնելու համար հարմար կլինեին նաև սիբիրյան հյուսիսային եղջերուները, բայց նրանց հյուսիսամերիկյան ենթատեսակը լավագույն ընտրությունն է Սանտայի համար:
Գիտնականը նշել է, որ Սանտան գիշերն է աշխատում, որպեսզի նրա եղջերուները չափազանց շատ չտաքանան ու առույգ մնան: Չափազանց շատ տաքանալը կարող է ազդել նաև եղջերուների ախորժակի վրա: Գիշերը մի տնից մյուսը գնալու ընթացքում եղջերուներն ընդմիջում են անում ու սնվում չոր քարաքոսներով:
Ըստ ամանորյա առասպելի՝ Սանտա Կլաուսը տեղավորվում է օդով թռչող եղջերուների սահնակին: Նրանցից ամենահայտնին Ռուդոլֆն է, որը լուսաշող կարմիր քիթ ունի:
