Պետք չէ պատասխանատվությունը դնել միայն Լևոն Տեր-Պետրոսյանի վրա. նա իր գործն արեց: Այսօր լրագրողների հետ հանդիպման ժամանակ այս մասին ասաց քաղաքագետ Ստեփան Գրիգորյանը՝ անդրադառնալով ներքաղաքական ներկայիս իրողություններին:
Նա կանխատեսեց, որ գալիք նախագահական ընտրություններում կոշտ պայքար չի լինի, դրանք կանցնեն առանց խախտումների և լարվածության: Ըստ նրա՝ ամբողջ պետությունը մեկ խնդիր ունի, որ այս ընտրությունները կճանաչվեն նորմալ ընտրություններ, քանի որ ժողովրդավարությունը մրցակցություն է պահանջում, ուստի անհրաժեշտ է մրցակցություն:
«Գրեթե բոլոր կուսակցությունների ներսում խմորումներ են, տրոհման գործընթաց է գնում: Ուստի ընդդիմադիր դաշտում համախմբումն այսօր անհնար է:
Առաջադրվեց Հրանտ Բագրատյանը, դա շատ լավ էր, սակայն մեծ տարբերություն կա նրանում՝ ի՞նքը առաջադրվի, թե՞ տասը կուսակցություն կհամախմբվի մեկի շուրջը: Մի բան է միայնակ առաջադրվելը, մեկ այլ բան՝ այլ կուսակցությունների սատարումով:
Ընդդիմադիր դաշտում համախմբում չկա, որի դեպքում խաղի կանոններն այլ են: Կուսակցությունների ներսում են գնում պրոցեսներ, և դրանք թույլ չեն տալիս ասել, որ լինի համարժեք դեմք Սերժ Սարգսյանին»,- նկատեց բանախոսը:
Անդրադառնալով ՀՀ առաջին նախագահ Լևոն Տեր-Պետրոսյանի չառաջադրման որոշմանը՝ նա ասաց, որ ամեն մարդ, այդ թվում՝ առաջին նախագահը, իրավունք ունի որոշում ընդունելու: Նրա համոզմամբ՝ անընդհատ պատասխանատվությունը առաջին, երկրորդ նախագահների վրա գցելը սխալ է: «Ի վերջո, նոր սերունդ պետք է գա նախագահների թեկնածուների. անընդհատ առաջին, երկրորդ, երրորդ նախագահների վրա հույս դնելը սխալ մոտեցում է, թող նոր գործիչները չվախենան առաջադրվելուց: Պետք չէ պատասխանատվությունը գցել Լևոն Տեր-Պետրոսյանի վրա, ինքն իր գործն արեց , 2008 թ. դուրս եկավ, համախմբեց հասարակությանը, համախմբում գնաց, դրանից հետո ակտիվացավ հասարակությունը, պետք չէ ավելին պահանջել:
Չի բացառվում, որ նա հասկանում է՝ կարճ ժամանակահատվածում չի կարող համախմբել ընդդիմադիր հատվածին»,- մեկնաբանեց Ստեփան Գրիգորյանը:
