Ռուսաստանի քաղաքացիների միայն 2 տոկոսն է Հայաստանը համարում բարեկամ երկիր: Իր այդ ցուցանիշով Հայաստանը նույն հորիզոնականն է զբաղեցնում Գերմանիայի հետ:
Ինչպես գրում է gazeta.ru-ն, վկայակոչելով Հասարակական կարծիքի ուսումնասիրության համառուսական կենտրոնի սոցիոլոգիական հարցման տվյալները, Ռուսաստանի բնակիչների կարծիքով իրենց երկրի գլխավոր բարեկամը շարունակում է մնալ Չինաստանը: Ընդ որում, 2008թ. հետո այդ երկրի համակիրների թիվը կրկնակի ավելացել է՝ 23 տոկոսից հասնելով 51-ի: Երկրորդ տեղում Բելառուսն է. նրան համակրում է հարցվածների 32 տոկոսը: Եռյակը եզրափակում է Ղազախստանը (20 տոկոս): Բելառուսի և Ղազախստանի դիրքերը նույնպես 2008թ. համեմատ ամրապնդվել են (2008թ. տվյալներով՝ նրանց համակրում էր Ռուսաստանի բնակիչների համապատասխանաբար 14 և 8 տոկոսը):
Ռուսաստանի բնակիչների աչքում իմիջային կորուստներ է կրել Գերմանաիան: Եթե 2008թ. ռուսների 17 տոկոսը Գերմանիան համարում էր բարեկամական երկիր, ապա այժմ այդ կարծիքին է հարցվածների միայն 2 տոկոսը: Ընդ որում, Բեռլինը նույն հորիզոնականն է զբաղեցնում Հայաստանի՝ Ռուսաստանի ռազմավարական դաշնակցի, և նախկին խորհրդային միության մյուս հանրապետությունների, ինչպես նաև Կորեայի և Մոնղոլիայի հետ:
Հակառեյտինգի առաջին հորիզոնականում ԱՄՆ-ն է: 2008թ. ԱՄՆ-ի նկատմամբ վատ վերաբերմունք ուներ հարցվածների 25 տոկոսը, այսօր այդ թիվը հասնում է 73-ի: ԱՄՆ-ին հաջորդում է Ուկրաինան (2008թ. 21 տոկոս, այսօր՝ 32): Մինչդեռ Վրաստանը, որը 2008թ. տրամաբանորեն Ռուսատսանի քաղաքացիների կողմից չընդունվող երկրների առաջին հորիզոնականում էր (իր տեղը կիսելով ԱՄՆ-ի հետ), այժմ ընկալվում է որպես չեզոք երկիր: 6 տարի առաջ Վրաստանը թշնամի էր համարում հարցված ռուսների 25 տոկոսը, այսօր՝ ընդամենը 1 տոկոսը:
Ռուսատսանի գլխավոր հակառակորդների շարում այսօր նշվում է Գերմանիան և Եվրամիությունն ընդհանուր առամամբ: Եթե 2008թ. այդպես կարծում էր հարցվածների միայն մեկ տոկոսը, ապա այսօր ամեն տասներորդը: Մեծ Բրիտանիան և Լեհաստանը եզրափակում են ռուսների համար ամենատհաճ երկրների հնգյակը (համապատասխանաբար 9 և 6 տոկոս), իսկ Ֆրանսիան և Կանադան թշնամական երկիր համարում է ռուսների 3 տոկոսը: