«Մեզ համար կարևոր է, որ Ալիև-Սարգսյան հանդիպումը կազմակերպում է Փարիզը»,- այսօր այս մասին լրագրողների հետ զրույցում ասաց Հայաստանում Գերմանիայի արտակարգ և լիազոր դեսպան Ռայներ Մորելը՝ անդրադառնալով Փարիզում տեղի ունենալիք Ալիև-Սարգսյան հանդիպման կարևորությանը:
Դեսպանը ողջունեց Ֆրանսիայի նախագահ Ֆրանսուա Օլանդի նախաձեռնությունը՝ Փարիզում կազմակերպել հանդիպում Սերժ Սարգսյանի և Իլհամ Ալիևի միջև: Ըստ նրա՝ շատ կարևոր է, երբ հանդիպում են հակամարտության մեջ գտնվող երկրների որոշում կայացնողները՝ նախագահները: «Մեզ համար կարևոր է նաև, որ այդ հանդիպումը կազմակերպում է Փարիզը, մենք այդ հանդիպման հետ հույսեր ենք կապում»,- նկատեց Ռայներ Մորելը:
Անդրադառնալով ֆրանս-գերմանական հաշտեցման դասերի կիրառմանը ԼՂ հակամարտության խաղաղ կարգավորման գործընթացում՝ ասաց, որ ֆրանս-գերմանական հաշտությունը մի հիանալի պատմական օրինակ է, թե ինչպես կարող են կարգավորվել հակամարտությունները: Նրա համոզմամբ՝ հակամարտությունների կարգավորման համար առաջին հերթին անհրաժեշտ է հակամարտող կողմերի կամքը ոչ միայն վերևից, այլև ներքևից՝ հասարակությունների մակարդակում: Դեսպանի համոզմամբ՝ եթե խոսքը Հայաստանի և Ադրբեջանի մասին է, ապա ԵԱՀԿ Մինսկի խումբն աշխատում է, իսկ հաջորդ քայլը պետք է լինի խոսքը, կողմերի միջև երկխոսությունը զարգացնելը:
Հիշեցնենք, որ ղարաբաղա-ադրբեջանական հակամարտ զորքերի շփման գծում և հայ-ադրբեջանական սահմանին օգոստոսյան լարվածությունից հետո ԵԱՀԿ Մինսկի խմբի համանախագահ պետությունների՝ Ռուսաստանի և ԱՄՆ-ի կողմից կազմակերպվեցին առանձին-առանձին հանդիպումներ, առաջինը՝ Ռուսաստանում, մյուսը՝ Նյու Պորտում: Հաջորդ նախագահական հանդիպումը կայանալու է Փարիզում հոկտեմբերի երկրորդ կեսին: