Թուրքական Miliyet թերթի փոխանցմամբ, երեկ Ստամբուլի 14-րդ ծանր հանցավորությունների դատարանում կայացել է հայազգի լրագրող Հրանտ Դինքի սպանության դատավարության հերթական նիստը:
Նիստին Դինքի ընտանեկան փաստաբան Ֆեթհիյե Չեթինը դատարանին ծանուցել է դեռևս Անկարայի դատարանում Տրապիզոնի փոխոստիկանապետ Նեջաթի Էրքիջիի տված մի կարևոր ցուցմունքի մասին:
Նշվում է, որ Հրանտ Դինքի մարդասպան Օգյուն Սամասթի հայրը, Դինքի սպանությունից ժամեր անց հեռուստացույցով տեսնելով իր որդուն, դիմել է Տրապիզոնի փոխոստիկանապետ Նեջաթի Էրքիջիին և հայտնել, որ փնտրվողն իր որդին է:
Էրքիջին, բնականաբար, մարդասպանի հորը հարցրել է, թե արդյոք նա տեղյա՞կ է որդու գտնվելու վայրի մասին, ինչին ստացել է «Այդ մասին կարող է իմանալ ժանդարմերիայի հրամանատարը, ում հետ որդիս հաճախ էր հանդիպում» պատասխանը:
Այժմ Ֆեթհիյե Չեթինը դատարանից պահանջում է, որպեսզի մարդասպանի հայրը, վկայի կարգավիճակով, ներկայանա դատարան և նշի, թե ով է եղել տվյալ ժամանակվա ժանդարմերիայի հրամանատարը, ում հետ Դինքի սպանությունից առաջ այդքան հաճախ հանդիպել է մարդասպան Օգյուն Սամասթը:
Հիշեցնենք, որ Հրանտ Դինքն սպանվեց 2007 թվականի հունվարի 19-ին Ստամբուլի Շիշլի թաղամասում Օգյուն Սամասթի կողմից: Մարդասպանը հրազենային 3 կրակոց էր արձակել Դինքի գլխին և բացականչել գյավուր (անհավատ), ինչը հիմք տվեց ենթադրելու, որ սպանությունն իրականացվել է ազգային հողի վրա:
2011 թվականի հունվարի 19-ին թուրք վերլուծաբան Մեհմեթ Ալի Բիրանդը Milliyet թերթում հրապարակած իր հոդվածում նշեց, որ Հրանտ Դինքն սպանվել է թուրքական պետության անտեսման արդյունքում, ինչի համար պատասխանատու բոլոր չինովնիկները ոչ միայն համապատասխան պատասխանատվության չենթարկվեցին, այլև պարգևատրվեցին:
Բիրանդի կարծիքով, Դինքի սպանության հարցում առաջին հերթին մեղավոր են Թուրքիայի ուժային կառույցները, քանի որ թե՛ ոստիկանությունը, թե՛ ժանդարմերիան, թե՛ գաղտնի ծառայության աշխատակիցները տեղյակ են եղել պատրաստվող սպանությունից, սակայն ոչինչ չեն ձեռնարկել Դինքի սպանության կանխման համար:
