ԱՄՆ-ում 33 մլրդ դոլարի սառեցված հաշիվները կփոխանցվեն Լիբիայի ժողովրդին: Այս մասին նախօրեին իր ելույթում ասել է ԱՄՆ նախագահ Բարաք Օբաման:
«Բացի, որպես ՆԱՏՕ-ի անդամ, մեր պարտավորություններից, մենք աշխատում ենք միջազգային հանրության հետ Լիբիայի ժողովրդին օգնություն ցուցաբերել, երբ անհրաժեշտ է սնունդ քաղցածների համար և բժշկական օգնություն` վիրավորներին:
Մենք կպահպանենք Լիբիայի կառավարության 33 մլրդ դոլարը, որը «սառեցրել ենք», և կուղղենք դրանք Լիբիայի վերականգնմանը: Ի վերջո, այդ գումարները չեն պատկանում ո՛չ Քադաֆիին, ո՛չ էլ մեզ: Դրանք պատկանում են լիբիացի ժողովրդին, և մենք պետք է համոզվենք, որ նա (ժողովուրդը.– 1in.am) այդ գումարները կստանա»,- ասել է Օբաման:
Հիշեցնենք, որ այսօր ԱՄՆ նախագահը հանդես է եկել հեռուստաուղերձով` ամերիկացիներին ներկայացնելով Լիբիայի իշխանությունների դեմ ռազմական գործողություններ սկսելու անհրաժեշտության հիմնավորումները:
