Հնդկաստանի իշխանությունները փակել են երկրի մայրաքաղաք Նյու Դելիի ճանապարհները՝ ցուցարարների երթը դեպի նախագահական նստավայր կանխելու համար: Այս մասին հաղորդում է Associated Press-ը:
Կենտրոնական գրասենյակների շատ աշխատակիցներ, ուսանողներ մեծ դժվարությունների են հանդիպում ճանապարհների շրջափակման պատճառով: Փակվել է նաև նախագահական նստավայրի շրջանում գտնվող մետրոյի ինը կայարան:
Հնդկաստանում խռովությունները ծագել են այն բանից հետո, երբ դեկտեմբերի 16-ին մի խումբ հարբած տղամարդիկ ավտոբուսում բռնաբարել էին 23-ամյա ուսանողուհու: Ցուցարարները պահանջում են հանցագործներին դատապարտել մահապատժի:
Հնդկաստանի վարչապետ Մանմոհան Սինգհը ցուցարարներին կոչ է արել հանգստություն ցուցաբերել: Վարչապետը խոստացել է անել հնարավորը` Հնդկաստանի քաղաքների փողոցներում անվտանգությունն ուժեղացնելու համար:
Ավելի վաղ ոստիկանները ցուցարարներին ցրելու համար կրակ էին բացել նրանց ուղղությամբ, կիրառել էին արցունքաբեր գազ, ջրցան մեքենա: Ցուցարարների և ոստիկանության միջև բախումների հետևանքով տուժել է ավելի քան 140 մարդ:
