RBC-ի փոխանցմամբ՝ Արևմտյան Վրաստանում գրանցված երկրաշարժի հետևանքով փլուզվել է մոտ 20 բնակելի շինություն: Երկրաշարժը գրանցվել է երեկ՝ տեղական ժամանակով ժամը 17.31-ին, և ունեցել է 5.9 մագնիտուդ ուժգնություն: Երկրաշարժի էպիկենտրոնը եղել է Վրաստանի սևծովյան ջրատարածությունում՝ Անակլիա հանգստավայրի շրջանում և գտնվել է ափից 30 կիլոմետր հեռավորության վրա:
Վրացական ԶԼՄ-ները հայտնում են, որ ավելի քան 10 շինություն փլվել է Աջարիայի գյուղերում, այդ թվում՝ նաև Չակվի, Գոնիո, Կոբուլետի և Սարփի սևծովյան հանգստավայրերում: Զոհեր չեն գրանցվել: Երկրաշարժի հետևանքով տուժել են նաև Վրաստանի երկրորդ խոշոր քաղաքի՝ Քութայիսի մի շարք տներ:
Դեպքի վայրում աշխատում են արտակարգ իրավիճակների ծառայության աշխատակիցները: Հատուկ հանձնաժողովը հաշվարկում է երկրաշարժի պատճառած վնասը: Տեղական ինքնակառավարման մարմինները խոստանում են փոխհատուցում հատկացնել տուժածներին:
