Այսօր ՀՀ սփյուռքի նախարար Հրանուշ Հակոբյանը ներկայացրեց 2012թ. ընթացքում նախարարության իրականացրած ծրագրերը: Նրա խոսքով` 2012-ին Սփյուռքն ավելի համախմբվեց հայրենիքի շուրջ, Հայաստանի միջազգային վարկն ավելի բարձրացավ, և սփյուռքահայերը հիմա ավելի շատ են ձգտում դեպի հայրենիք, Սփյուռքը դառնում է ավելի հայաստանակենտրոն, և նոր վստահության մթնոլորտ է ստեղծվում:
Նախարարըը նշեց, որ համահայկական կառույցների հետ սփյուռքի նախարարությունն ավելի շատ ծրագրեր է իրականացնում, Սփյուռքը դառնում է Հայաստանի շարունակությունը, և գլխավոր խնդիր է դառնում Հայաստանին աջակցելը:
Հրանուշ Հակոբյանը երեք գլխավոր ռազմավարական ծրագրերից առանձնացրեց համահայկական դպրոցի ստեղծումը, հայրենաճանաչությանն ուղղված ծրագրերի իրականացումը:
Ամեն օր նախարարություն է այցելել 30 սիրիահայ, որոնց լսել են և փորձել աջակցել: Փոփոխվել են ՀՀ օրենքներն ու կառավարության որոշումները` կապված վիզաների հետ, ինչպես նաև լուծվել են վիզաների երկարաձգման, կացության ժամանակավոր և մշտական կարգավիճակ ստանալու հարցերը:
Այս պահին ՀՀ-ում գտնվում է 6000 սիրիահայ` մոտ 2000 ընտանիք, բուհերում սովորում են 220 ուսանող, դպրոցներ և մանկապարտեզներ են հաճախում ավելի քան 695 երեխա, աշխատանքի կարիք են ունեցել 700-ը, որոնցից 300-ը արդեն աշխատանք ունի:
Նախարարը շնորհակալություն հայտնեց շատ գործարարների, որոնք սիրիահայերին աշխատանքի են տեղավորել:
Սիրիահայ գործարարներն օրերս հանդիպել են Սերժ Սարգսյանին, և, նախարարի խոսքով, Հայաստանում պայմաններ կստեղծվեն նրանց բիզնեսի ծավալման համար: Շուրջ 60 սիրիահայ ոսկերչի շուտով կտրամադրվի տարածք:
Լոռու,Շիրակի, Սյունիքի մարզերում աշխատանքի են տեղավորվել սիրիահայ բժիշկներ, որոնց ծառայության որակից բնակիչները շատ գոհ են:
Սիրիահայերը, իհարկե, ունեն նաև բնակարանի խնդիր, մի հատվածը բնակարաններ ունի, բայց մեծ մասը վարձով է ապրում: Հրանուշ Հակոբյանը նշեց, որ շատ հայ ընտանիքներ իրենց բնակարանները անվճար տրամադրեցին սիրիահայերին: Միգրացիոն պետական ծառայությունը մոտ հարյուր ընտանիքի ապաստան են հատկացրել:
