Դեկտեմբերի կեսերին Հյուսիսային Կորեայի կողմից արձակված հրթիռը վկայում է այն մասին, որ Փխենյանը ունակ է արձակել հրթիռ, որը կկարողանա հաղթահարել 10 հազար կմ հեռավորություն և հայտնվել ԱՄՆ-ի արևմտյան ափում: Ինչպես հաղորդում է բրիտանական The Telegraph պարբերականը, նման կարծիք են հայտնել հարավկորեացի պաշտոնյաները:
Հարավային Կորեայի պաշտոնյաների գնահատականը հիմնված է դեկտեմբերի 12-ին արձակված հյուսիսկորեական հրթիռի հայտնաբերված բեկորի ուսումնասիրությունների վրա:
Ինչպես պարզվել է՝ եռաստիճան հրթիռը բալիստիկ ունակություններ ունի, մինչդեռ Փխենյանը պնդում էր, որ Unha-3 հրթիռը նախատեսված է բացառապես գիտական առաքելության, մասնավորապես` եղանակի վերաբերյալ տվյալներ հավաքելու և փոխանցելու համար: Արևմուտքը հենց սկզբից կասկած էր հայտնել առ այն, որ այդ ամենի քողի ներքո Հյուսիսային Կորեան բալիստիկ հրթիռ է փորձարկում:
Հարավային Կորեայի պաշտպանության նախարարության փոխանցմամբ՝ հրթիռն ունակ է թռչել 10 հազար կմ՝ 500-600 կգ մարտագլխիկով:
Նշենք, որ բեկորը հայտնաբերվել է Հարավային Կորեայի Կունսան քաղաքից 160 կմ հեռավորության վրա՝ ծովում: