Գերմանիայի կրթության նախարար Անետա Շավանը հերքել է դոկտորական ատենախոսության գրագողության մեղադրանքը: Այս մասին նա հայտարարել է Die Welt թերթին տված հարցազրույցի ժամանակ:
57-ամյա Շավանի խոսքերով՝ ատենախոսության հարցում իր խիղճը լիովին մաքուր է։ Նախարարը նաև պարզաբանել է, թե ինչու է քիչ մեկնաբանություններ տալիս այս կապակցությամբ: Նա կարծում է, որ յուրաքանչյուր մեկնաբանություն կարող է ազդել գործընթացի և համալսարանական հանձնաժողովի կարծիքի վրա:
Շավանն ընդգծել է, որ կցանկանար մնալ կրթության նախարարի պաշտոնում սեպտեմբերին կայանալիք ընտրություններից հետո:
Ավելի վաղ Դյուսելդորֆի Հենրիխ Հայնեի անվան համալսարանում, որտեղ Շավանը պաշտպանել էր իր ատենախոսությունը, ստեղծվել էր հատուկ հանձնաժողով, որն ուսումնասիրել է նրա ատենախոսությունը: Փորձագետները որոշ փոխառություններ են հայտնաբերել և փիլիսոփայության ֆակուլտետին, որի շրջանավարտն է Շավանը, խորհուրդ են տվել ստուգել ամբողջ ատենախոսությունը: Հունվարի 22-ին պարզ կդառնա՝ արդյոք հետաքննությանն ընթացք կտրվի՞, թե՞ ոչ:
Շավանի աշխատանքը, որը պաշտպանել է 1980 թ., կոչվում է «Անհատը և խիղճը»: Գերմանիայի կրթության նախարարի դեմ մեղադրանքները ի հայտ են եկել 2012 թ. ապրիլին Ռոբերտ Շմիդտ անունով բլոգերի ստեղծած հատուկ կայքում: