Վենեսուելայում ընդդիմությունը քննադատել է Ուգո Չավեսին փոխարինողին՝ փոխնախագահ Նիկոլաս Մադուրոյին, փոխանցում է Reuters-ը: Նախագահի քաղաքական հակառակորդներն իրենց տարածած հայտարարության մեջ Մադուրոյին անվանել են իր ղեկավարի «թույլ պատճենը»:
Հիշեցնենք, որ Չավեսը բուժման կուրս է անցնում Կուբայում, ինչի պատճառով նա իրեն փոխարինող է նշանակել Մադուրոյին, որը նախկինում ղեկավարել է արտաքին գործերի նախարարությունը:
«Փոխնախագահ Նիկոլաս Մադուրոն վատ է սկսել իր ժամանակավոր կառավարումը: Պարոն Մադուրո, երկիրը Ձեզնից ավելին է սպասում, քան Ձեր ղեկավարի կույր ընդօրինակումը: Իր հռետորաբանությամբ Մադուրոն ծածկում է կառավարական ճգնաժամը, որը ստեղծվել է նախագահ Չավեսի բացակայության պատճառով: Նա իր թուլությունները թաքցնում է աղաղակների և սպառնալիքների տակ»,- ասված է հայտարարությունում: Փաստաթուղթն ավարտվում է կոչով փոխնախագահին՝ հասնել լայն ազգային միասնության:
Ընդդիմության հայտարարությունը փոխնախագահի հրապարակային հայտարարությունների արձագանքն է, որոնցում նա օգտագործել է Չավեսի հռետորիկ հնարքներն ու արտահայտությունները:
Եթե Չավեսը չկարողանա 2013-ի հունվարի 10-ին ստանձնել իր պաշտոնավարման նոր ժամկետը, 30 օր հետո Վենեսուելայում նոր նախագահական ընտրություններ կանցկացվեն: Մադուրոյի գլխավոր մրցակիցը կլինի ընդդիմության թեկնածու Էնրիկե Կապրիլեսը, որն այս տարի ընտրություններում պարտվեց Չավեսին:
