ԱՄՆ նախագահ Բարաք Օբամայի նախկին խոսնակ Ռոբերտ Գիբսը, որը անցած ամիս հրաժարվել էր իր պաշտոնից` այլ աշխատանքի անցնելու համար, հնարավոր է՝ աշխատանքի անցնի Facebook սոցիալական ցանցում: Այս մասին հաղորդում է The New York Times օրաթերթը:
Ընկերությունում այս լուրը պաշտոնապես չեն հաստատում, չի նշվում նաև, թե ինչ պաշտոնի է անցնելու Գիբսը: Թերթը հետաքրքրական է համարում այս փաստն այն պատճառով, որ հրաժարական տալիս դեմոկրատները նշում էին, որ Գիբսը ներգրավվելու է Օբամայի նախընտրական քարոզչությանը 2012 թ. ընտրությունների ժամանակ: Նաև տեղեկացվում է, որ Գիբսը կարող է նաև միլիոնավոր օգուտներ ստանալ այն բանից հետո, երբ Facebook-ը վաճառքի հանի իր բաժնետոմսերի մի մասը և IPO անցկացնի: Դա նախատեսվում է մոտ ժամանակներում:
Հիշեցնենք, որ 2009 թ., երբ նախագահ ընտրվեց Բարաք Օբաման, Ռոբերտ Գիբսը ստանձնեց Սպիտակ տան խոսնակի պաշտոնը: 2011-ին նրան այդ պաշտոնում փոխարինեց Ջո Բայդենի մամուլի ծառայությունում և Time ամսագրում աշխատած Ջեյ Քարնին:
