«Առաջին լրատվական»-ը զրուցել է կինոռեժիսոր, դերասան Ռուբեն Գևորգյանցի հետ:
– Պարոն Գևորգյանց, երկու օր է, ինչ մեր հասարակության մեջ քննարկվում է այն թեման, որ ինքնակամ հրաժարական տված Սյունիքի նախկին մարզպետը փաստորեն վերադարձավ իր պաշտոնին: Մարդ, ում հետ կապված են բազմաթիվ խնդիրներ, ով հասարակության մեջ չունի վստահության քվե, և շատերը նրա տեղը բանտն են համարում: Դուք, որպես մտավորական, ինչպե՞ս եք գնահատում այս քայլը:
– Ես գտնում եմ, որ ինքը պետք է նորից հրաժարվի, և դա կլինի իր ամենամեծ նվիրատվությունը հայ ազգին: Ոչ թե նրա համար, որ ինքը լավ կամ վատ մարզպետ է, այլ որովհետև ժողովուրդն իրեն չի ուզում: Ես ծանոթ չեմ այդ մարդու հետ, բայց այնքան բաներ եմ լսել: Կարող է՝ կեսը սուտ է, կեսը՝ ճիշտ: Բայց եթե անգամ 10%-ն է ճիշտ, ապա ինքը պետք է հրաժարական տա, որովհետև դա բոլորիս ամոթն է:
– Նույնիսկ թուրքական մամուլն է անդրադառնում այս խնդրին և ծաղրում մեզ:
– Թուրքական մամուլը թող մտածի իրենց նախագահի մասին, որովհետև ինձ համար դա նույն բանն է՝ Էրդողանի կերպարը չի ոգևորում:
– Հայաստան-Սփյուռք համաժողովը նոր է ավարտվել: Եղեռնի 100-ամյակին ընդառաջ՝ մենք ի՞նչ ծրագրեր ենք կարողանում իրականացնել, արդյոք կարողանո՞ւմ ենք հավուր պատշաճի նախապատրաստվել 100-ամյակին:
– Բոլորս, իհարկե, նախապատրաստվում ենք՝ ֆիլմեր ենք նկարում, հոդվածներ ենք գրում, բայց մենք աշխարհին չենք կարողանալու ասել այն, ինչ ուզում ենք: Դա մեզ մոտ չի ստացվի: Դա մեր բնանկարն է, մենք ուղղակի չենք կարողանում, ոչ թե չենք ուզում:
– Խնդիրը ո՞րն է՝ ֆինանսակա՞նը:
– Ֆինանսականը չէ, մենք մեր մենթալիտետով ենք այդպիսին: Մենք չենք կարողանում ամբողջ աշխարհին ցնցել: Աշխարհը, իհարկե, կարձագանքի, ևս մի տասը երկիր կճանաչի Ցեղասպանությունը:
– Իսկ մասոնները այս մասով ինչ-որ քա՞յլ կանե՞ն Հայաստանում:
– Մասոնները միշտ էլ անում են: Եվ երևի այսօր հենց իրենք են անում Ցեղասպանության ընդունման համար: Իսկ այդ օրը մենք երթ կունենանք և այլն:
– Այսինքն՝ ավելի բա՞ց կսկսեք գործել:
– Մասոնները բաց չեն գործում, կանոնադրությունն է այդպիսին: Իհարկե, տարբեր մասոններ կան: Կան մեր կողմից չընդունված մասոններ, որոնք ամեն ինչ բացեիբաց են անում, բայց նրանց հետ մեզ պետք չէ խառնել: Մենք ինչ պետք է՝ անում ենք, մեծ ծրագրեր կան, Թուրքիան էլ է մասնատվելու 2022-2023թթ., ամեն ինչ ծրագրավորված է: