Ճապոնիայում բժիշկները հաստատել են առնվազն 1 մարդու մահվան փաստը Օնտակե հրաբխի ժայթքման հետևանքով: Ժայթքումը սկսվել է այսօր առավոտյան՝ Ճապոնիայի Նագանո պրեֆեկտուրայում: Ընդհանուր առմամբ բուժօգնության կարիք են ունեցել 70 տուժածներ, որոնցից 30-ը ծանր վիճակում հոսպիտալացվել է: Այս մասին գրում է ITAR-TASS-ը՝ վկայակոչելով պրեֆեկտուրայի իշխանություններին:
Նշենք, որ անսպասելի ժայթքումը շփոթեցրել է մի քանի հարյուր լեռնագնացների և զբոսաշրջիկների, ովքեր այդ պահին գտնվել են հրաբխի շրջանում: Նրանցից մոտ 60-ը կարողացել են միանգամից ներքև իջնել: Մյուսները օդում մոխրի առկայության պատճառով ստիպված են եղել թաքնվել Օնտակեի լանջերի երկու լեռնագնացային ճամբարներում:
Ներկա պահին փրկարարների օգնությամբ ներքև է իջել 230 մարդ: Հրաբխի լանջերին մնացածների թիվը դեռևս հայտնի չէ:
