Եմենի նախագահ Ալի Աբդալլահ Սալեհը հայտարարել է, որ եթե նա հեռանա, ապա անխուսափելի է, որ երկիրը կընկղմվի քաոսի մեջ, այնպես, ինչպես դա տեղի ունեցավ Սոմալիում 20 տարի առաջ և շարունակվում է մինչև մեր օրերը: «Մենք ընդդիմությանը առաջարկում ենք համատեղ քննարկել իշխանության խաղաղ փոխանցման խնդիրը: Մենք կառչած չենք իշխանությունից, սակայն թույլ չենք տա դրա փոխանցումը ցանկացած մեկին»,- ասել է Սալեհը Al-Arabia հեռուստաընկերությանը տված հարցազրույցում:
Նա աննորմալ է համարել այն իրողությունը, երբ «փոքրամասնությունը փորձում է մեծամասնությանը պարտադրել իր կամքը»: Սալեհը պատրաստակամություն է հայտնել առաջիկա 60 օրերի ընթացքում իշխանությունը հանձնել փոխնախագահ Աբդ Ռաբբ Մանսուր Հադիյին` նախօրոք ստանալով անվտանգության երաշխիքներ:
Նախորդ օրը Եմենի իշխանությունների և ընդդիմության բանակցությունները տապալվել են և մոտ ժամանակներս չեն վերսկսվի: Այս մասին հայտարարել է ընդդիմության կողմն անցած գեներալ Ալի Մոհսենը,- հաղորդում է Reuters գործակալությունը:
Հիշեցնենք, որ, չնայած երկրում մտցված արտակարգ դրությանը, իշխանություններին չի հաջողվել վերահսկողություն սահմանել երկրում և վերականգնել կարգը, քանի որ երկրի բոլոր քաղաքներում շարունակվում են բողոքի ակցիաները: Ընդ որում, երեկ տեղեկություններ էին տարածվել, որ «Ալ-Քաիդա»-ի գրոհայինները գրավել են երկրի հարավային քաղաքներից մեկը: