Եթե Վրաստանն անձամբ հրաժարվի «օկուպացիա» տերմինից, ապա «մեր պետականության զարգացման բոլոր հեռանկարները կվերանան, քանի որ մենք կզրկվենք միջազգային աջակցությունից և Ռուսաստանի հետ դեմ առ դեմ կմնանք». նման հայտարարություն է արել Վրաստանի նախագահ Միխեիլ Սաակաշվիլին նախագահական պալատում մամուլի ներկայացուցիչների հետ հանդիպման ժամանակ: Այս մասին հայտնում է Gruziya Online-ը:
«Եթե դու անձամբ չես ցանկանում ճանաչել օկուպացման փաստը, ապա ինչո՞ւ դա պետք է անեն եվրոպացիները, ԱՄՆ-ը, առավել ևս՝ երրորդ աշխարհի երկրները»,- ասել է նա:
Սաակաշվիլին ընդգծել է, որ «ատամներով է պահել» Լատինական Ամերիկայի և Կարիբյան ավազանի երկրներին Աբխազիայի և Հարավային Օսիայի ճանաչումից:
«Մենք չպետք է դեմ առ դեմ մնանք ռուսերի հետ: Նրանք կփորձեն լուռումունջ հաշտեցնել մեզ իրենց իրականության հետ, իսկ իրականությունը մեկն է՝նրանք մեզ իրենց տիրապետության տակ չեն առնի, եթե մենք չճանաչենք նրանց իշխանությունը»,- ասել է նա:
Սաակաշվիլին նշել է, որ Ռուսաստանի հետ մտերմանալու Վրաստանի փորձերն արդեն բացասական արդյունքներ են տալիս:
«Այսօր Պուտինը ծաղրանքով ասաց այն, ինչ սպասում էի. «Վրաստանը Ռուսաստանի կարիքն ավելի շատ ունի, քան մենք՝ նրա», այդ իսկ պատճառով նրանք պայմաններ են թելադրում»,- նշել է Սաակաշվիլին:
Սաակաշվիլին Ժնևում Վրաստանի հատուկ ներկայացուցիչի և ՌԴ նախագահի ներկայացւցչի հանդիպումը անհանգստացնող գործոն է համարում: «Դրանով իսկ նրանք ցանկանում են թուլացնել Ժնևյան ձևաչափը, որը բազմակողմանի է, և որտեղ մենք աջակցություն ունենք»,- նշել է նա: