ԱՄՆ-ի բնակչությունը 2012 թվականին աճել է 2.3 միլիոնով՝ հասնելով 313.9 միլիոնի: Աճի տեմպերը վերջին 12 ամիսներին ավելի արագ են եղել, քան 2011 թվականին, որի տեմպն ամենադանդաղն է եղել 1937 թվականից հետո: Այս մասին հայտնում է ITAR-TASS-ը՝ հղում անելով ԱՄՆ մարդահամարի բյուրոյին:
Դա բացատրվում է առաջին հերթին գլոբալ տնտեսական ճգնաժամով, որը հանգեցրել է երկրի բնակչության եկամուտների կրճատմանը: Համապատասխանաբար, 2012 թվականին, երբ ազգային տնտեսությունը սկսել է կարգավորվել, բարելավել է նաև իրավիճակը ծնելիության ոլորտում: Բացի այդ, այդ շրջանում համեմատաբար բարձր է եղել նաև էմիգրացիայի մակարդակը:
ԱՄՆ Մարդահամարի բյուրոյի կանխատեսումներով՝ առաջիկա երկու տարիներին ԱՄՆ բնակչության աճի տեմպերը կպահպանվեն նախկին մակարդակի վրա և չեն գերազանցի 0.8 տոկոսը, սակայն այնուհետև այդ ցուցանիշը կսկսի ընկնել և աստիճանաբար կհասնի 0.5 տոկոսի նշագծին:
Ամերիկայի բնակչության աճի ամենաբարձր տեմպերը դիտվել են Երկրորդ համաշխարհային պատերազմի հետո՝ շրջան, որը ժողովրդագրության մեջ ստացել է baby boom անվանումը: Պիկը եղել է 1950 թվականին, երբ ԱՄՆ քաղաքացիների թվաքանակն ավելացել է 2 տոկոսով: Նրանք, ովքեր ծնվել են հետպատերազմական տարիներին, այժմ 60 տարեկան են. երկրի բնակչությունը ընդհանուր առմամբ ծերանում է:
