Ամերիկյան երեք սենատորներ, այդ թվում նաև նախագահի նախկին թեկնածու Ջոն Մաքքեյնը, քննադատել են Ուսամա բեն Լադենի ոչնչացման գործողությունների մասին կինոնկարի հեղինակներին, որտեղ ներկայացված են ԿՀՎ-ի գործակալների կողմից կտտանքների ենթարկելու միջոցով տեղեկատվություն ստանալու դրվագներ։
Մաքքեյնը, Դայան Ֆայնստայնը և Կարլ Լևինը Sony Pictures-ի ղեկավար Մայքլ Լինթոնին նամակ են ուղարկել, հաղորդում է Agence France-Presse-ը։ Սենատորների կարծիքով՝ Քեթրին Բիգելոուի Zero Dark Thirty ֆիլմում աղճատված են ամերիկյան հետախուզությանը վերաբերող փաստերը։ Ֆիլմում շատ են դրավագները, որտեղ հետախուզության գործակալները կասկածյալներին բռնությունների և խոշտանգումների են ենթարկում՝ իրենց համար անհրաժեշտ տեղեկություններ կորզելու համար։ Նամակի հեղինակների խոսքերով՝ իրենք փորփրել են ԿՀՎ-ի արխիվները և բացահայտել, որ իրականում այդպես չի եղել։
Օրենսդիրների եռյակը պնդում է, որ ֆիլմում պետք է նշվեր, որ պատումը հիմնված չէ իրական փաստերի վրա և միայն գեղարվեստական հորինվածք է։ Sony Pictures-ի նախագահը, հղում անելով Բիգելոուին և սցենարի հեղինակ Մարկ Բոելին, ասել է, որ ֆիլմի հեղինակները փորձել են սահմանափակ ժամանակի շրջանակներում ցույց տալ «համար առաջին ահաբեկչի» վնասազերծման համար իրականացված բոլոր վիճելի մեթոդների մասին խոսակցությունները։ Ֆիլմի ստեղծողների մոտեցմամբ՝ համատեքստից կտրված տեսարաններից պետք չէ վերջնական պատկերացում կազմել ահաբեկչի վնասազերծման բարդ գործողությունների մասին։
Zero Dark Thirty-ի բեմադրիչը (առաջին կին օսկարակիրը ռեժիսուրայի համար) մինչև ֆիլմի էկրաններին հայտնվելը դարձյալ ընկել էր սկանդալային պատմության մեջ։ Այդ ժամանակ Ներկայացուցիչների պալատի անդամները ՊՆ-ի և ԿՀՎ-ի աշխատակիցներին մեղադրել էին, որ նրանք պետական գաղտնիք պարունակող տվյալներ են տրամադրել Հոլիվուդին։
