Այսօր եռյակի՝ Աբովյանում կազմակերպած հանրահավաքը մարզային հանրահավաքի համար բավական մարդաշատ էր: Մարդիկ գալիս էին ավտոբուսներով հարակից գյուղերից, բայց որքան էլ հետաքրքիր էր, բոլորին միայն մեկ հարց էր հուզում՝ աշխատատեղերի պակասը:
«Սպասելիքներ ունենք, որ լավ երկիր լինի, մարդիկ աշխատատեղ ունենա, թե չէ սա ապրելու տեղ չի: Սպասում ենք, որ գոնե մի լավ բան լինի մեր սերունդի համար, որ աշխատատեղ ունենան: Ուզում ենք, որ լավ ղեկավար լինի, լավ թագավորություն լինի: Դրանից հետո լավ կլինի, էլի»,- «Առաջին լրատվական»-ի հետ զրույցում ասաց մի աբովյանցի: Ապա նա անցավ քաղաքական դաշտ՝ գովերգելով Ծառուկյանին և հավելելով, որ իրենք ևս կողմնակից են իշխանափոխության: Հիշեցումից հետո, որ ԲՀԿ-ն ամբողջական իշխանափոխություն չի պահանջում, մեր զրուցակիցը նկատեց. «Դե եթե ինքը չի պահանջում, ուրեմն մենք էլ չենք պահանջի: Ինչ ասեմ»:
«Ամենաճիշտն էն ա, որ Ծառուկյանը թեկնածությունը դնի, գնանք 99 տոկոսով իրան ընտրենք: Էդ պաշտոնում մենակ Ծառուկյանը կարա լինի: Ամեն ձևի սաղին օգնում ա: Թող դնի, էլի, սաղս էլ իրա հետևն ենք: Ծառուկյանն ամեն ինչ էլ կարա անի, եթե ամբողջ իշխանությունը իրա ձեռը լինի»,- ասաց մեկ այլ աբովյանցի:
68-ամյա Խաչիկն էլ որևէ լավ բանի ակնկալիք չունի: «Բոլորը մենակ խոսում են, ոչ մի լավ բան չկա: Մենակ խոսելով չի, պետք է գործ անեն, խոսքից գործի անցնեն: Բայց իրենք կոնտր են գնում իրար: Սրանից ոչ մի լավ բան մի սպասեք: Քանի հավաքվեք, էնքան վատ ա լինելու, քանի որ իրար դավաճանում են, իրար «պրոտիվ» են գնում: Իշխանափոխություն էլ լինի՝ որևէ լավ բան չենք սպասում»,-ասաց նա:
Նշենք, որ հանրահավաքից հետո էլ մարդիկ առհասարակ բան չհասկացան: Նրանք կայծակնային արագությամբ լքեցին հրապարակը: «Ինչ հասկանայինք, ընթացքում տեսնենք ինչ կլինի: Ասում են՝ ամսի 10-ից ա կախված: Էս անգամ էլ փորձենք: Ինչպես ասում են՝ փորձը փորձանք չի»,-հանրահավաքից հետո ասաց մասնակիցներից մեկը:
