Որքան էլ հասարակության մի ստվար զանգված և հատկապես լրագրողական հանրությունը դժվարանում էր հավատալ Սուրիկ Խաչատրյանի՝ Սյունիքի մարզպետ վերանշանակման հնարավոր տարբերակին, այնուամենայնիվ այսօր պարզ դարձավ, որ գործադիրը որոշել է ի հեճուկս հասարակության ցանկությունների ու սպասումների Ս. Խաչատրյանին դարձյալ պարգևատրել՝ նրան վերադարձնելով Սյունիքի մարզպետի պաշտոնը:
Մարզպետի պաշտոնից հրաժարական էր ներկայացրել իր տան դիմաց հնչած կրակոցներից հետո, երբ մահացավ Ավետիք Բուդաղյանը, իսկ հայ բանակի գնդապետ Արտակ Բուդաղյանը ծանր վիրավորվեց: Այն ժամանակ Ս. Խաչատրյանը ասել է, որ ինքը արձակուրդ է գնում:
Այսօր էլ, երբ Արտակ Բուդաղյանը մեզ հետ զրույցում լսեց Սուրիկ Խաչատրյանի՝ Սյունիքի մարզպետի պաշտոնում վերանշանակվելու մասին, նույն կերպ պատասխանեց. «Ես զինվորական եմ և ցավոք, կարծիք հայտնելու իրավունք չունեմ»:
Նրա հայրը՝ Էմիլ Բուդաղյանը, ԳԱԼԱ-ի հետ զրույցում, պատասխանելով մեր այն հարցին, թե արժե՞ արդյոք, որ Ձեր որդին այսքանից հետո ծառայի բանակում, ասել է. «Բանն այն է, որ իմ որդին այս իշխանությունների զինվորը չի, ինքը էս երկրի իսկական զինվորն է, իշխանությունները գնալու են, երկիրը մնալու է, իսկ ինքը երկրի հավատարիմ զինվորն է…»:
Անդրադառնալով Ս. Խաչատրյանին մարզպետ նշանակման փաստին՝ Էմիլ Բուդաղյանն ասաց, թե Հովիկ Աբրահամյանի բաղձանքը կատարվեց, ըստ նրա՝ տեղեկություններ կային, որ Հ. Աբրահամյանը դեռ մի քանի ամիս առաջ ցանկություն ուներ Ս. Խաչատրյանին մարզպետ նշանակելու:
«Ինչ ասեմ, սա բոլորիս ամոթն է՝ և իմ, և Արտակի, և մեր հարազատների, և ձեր՝ լրագրողական ամբողջ աշխարհի և նաև բոլոր հայերի… որ նրան նորից նշանակում են: Ես չգիտեմ էլ ինչ քայլեր կձեռնարկեմ, ես սպասում եմ դատաքննության ավարտին, չնայած հիմա ընդհանրապես ոչ մի հույս չունեմ…»:
Մանրամասները՝ թերթի այսօրվա համարում
