Շվեյցարիայի իշխանությունները ձերբակալել են Իրաքի 3 քաղաքացու, ովքեր կապված են «Իսլամական պետություն» ահաբեկչական խմբավորման հետ և պատրաստվել են ահաբեկչություն իրականացնել համադաշնության տարածքում: Tages Anzeiger Zürich թերթը հայտնում է, 3 կասկածյալները ձերբակալվել են մարտի վերջին, և այդ ժամանակից ի վեր գտնվում են մայրաքաղաք Բեռնի բանտերում:
Ինչպես գրում է թերթը, նրանց ձերբակալության պատճառ է դարձել նախազգուշացումը, որը ստացվել էր բարեկամական երկրի հետախուզական ծառայությունից: Թե որ երկիրն է դա՝ չի հաղորդվում:
Հետախուզական ծառայությունը հետևել է 3 տղամարդկանց, լսել նրանց զրույցները և եկել եզրահանգման, որ լուրջ հիմքեր կան ենթադրելու, որ նրանք ահաբեկչություն են պատրաստել պայթուցիկ նյութերի և մահաբեր գազի կիրառմամբ:
Դրանից բացի՝ ձերբակալվածները փորձել են Շվեյցարիայում ստեղծել «Իսլամական պետության» բջիջ:
Թերթի տվյալներով՝ նրանցից երկուսը 28 և 33 տարեկան են, բնակվել են գերմանախոս Արգաու և Շաֆհաուզեն կանտոնների տարածքում: Մյուսը որպես իր վերջին մշտական բնակության վայր նշել է Դամասկոսը:
Շվեյցարիայի գլխավոր դատախազությունը հետաքննություն է սկսել նրանց դեմ:
Բեռնի դատարանը մերժել է նրանց ազատ արձակման վերաբերյալ փաստաբանների բոլոր հայցերը:
