ՄՄ-ին Հայաստանի անդամակցության հետ կապված բոլոր հարցերը համաձայնեցված են: «Առաջին լրատվական»-ի հետ զրույցում ասաց Ռուսաստանի Դաշնության 1-ին կարգի պետական խորհրդական, REX գործակալության ղեկավար, քաղաքագետ Մոդեստ Կոլերովը՝ անդրադառնալով ՄՄ-ին Հայաստանի անդամակցության հարցում առկա խնդիրներին:
Նա նշեց, որ եվրասիական երկրների միջև Հայաստանի՝ ՄՄ-ին անդամակցելու հարցում խնդիրներ և տարաձայնություններ չկան: Ըստ նրա՝ ՄՄ-ին միանալու տեխնոլոգիաներն արդեն համաձայնեցված են, և ոչ մի խոչընդոտ չկա:
«Հայաստանի համար ևս, ըստ էության, այդ պայմանագրի ստորագրման համար խոչընդոտներ չկան: Եթե ինչ-ինչ հարցեր անսպասելիորեն առաջանան վերջին պահին, չնայած չեմ կարող ենթադրել, թե ինչ հարցերի մասին կարող է խոսք գնալ»,- ասաց Կոլերովը:
Հիշեցնենք, որ ՌԴ Դումայի՝ ԱՊՀ հարցերով հանձնաժողովի ղեկավար Լեոնիդ Սլուցկին հայտարարել էր, որ Եվրասիական տնտեսական միության ստեղծման պայմանագրի վավերացումը նախատեսվում է իրականացնել համաչափ` Ռուսաստանի, Բելառուսի, Հայաստանի և Ղազախստանի խորհրդարանների կողմից: «Ռուսաստանին, Բելառուսին և Ղազախստանին կմիանան նաև այլ երկրներ. հոկտեմբերի 9-ին՝ Հայաստանը, իսկ հետո՝ Ղրղըզստանը»,- նշել էր Սլուցկին:
Օրերս ՀՀ ԱԳ նախարար Էդուարդ Նալբանդյանը ևս տեղեկացրել էր, որ շուտով Հայաստանը կմիանա Մաքսային միությանը:
