Գեղարքունիքի մարզի Դարանակ գյուղի և Արմավիրի քաղաքապետի ընտրությունները ցույց տվեցին, որ հերթական անգամ ընտրությունները կեղծվում են, իսկ ընտրակաշառքը շարունակում է ակտուալ մնալ։ Այնինչ իշխանությունը հայտարարում է, որ ընտրությունները հերթական անգամ անցնելու են արդար և առանց ընտրակաշառքների։
ԱԺ ՀՀԿ-ական պատգամավոր Հովհաննես Սահակյանին հարցրինք` կարելի՞ է ասել, որ իշխանությունը ընտրական իրավիճակին չի տիրապետում, ինչին ի պատասխան արձագանքեց. «Պարտվող կողմը կարող է դիմել դատախազություն, Սահմանադրական դատարան և վերականգնել իր իրավունքները։ Ավելին, եթե չեմ սխալվում, Դարանակում 2-րդ անգամ են ընտրություններ իրականացվում»։
Ընդհատելով Հովհաննես Սահակյանին` նշեցինք, որ Դարանակից այսօր ենք ահազանգ ստացել, որ կրկին ընտրակաշառք է բաժանվում. «Գիտեք ինչ, երևույթին, խնդրին կամ հարցադրմանը նայենք 2 տեսանկյունից։ Ես` որպես Ընտրական օրնսգրքի բարեփոխման խմբի ակտիվ մասնակից, այս առումով մի շարք եվրոպական գրականություն եմ ուսումնասիրել, իմ մասնակցությունը տեղի ընտրություններին ինձ մոտ լուրջ մտահոգություն է առաջացրել, որ պարտվող կողմը պարտադիր հնչեցնում է, որ կեղծվել են։ Այսինքն` պարտվողական հոգեբանությունն է տանում դրան։ Պտիչկա դնելու համար մի քանի օր առաջ սկսում են ահազանգել ընտրակաշառքի, ընտրակեղծիքի, առևանգման մասին և հետևապես ահազանգում են ընդդիմադիր թերթերի միջոցով։ Շատ վատ ավանդույթ է ձևավորվել, և մենք պետք է հետ կանգնենք այդ աթոռամոլությունից ու պարտվողի հոգեբանությունից։ Պետք է ընդունենք` ինչպես սպորտում, այնպես էլ քաղաքականության մեջ մեկը հաղթում է, մյուսը պարտվում»։
Այնուամենայնիվ, պետք է արձանագրենք, որ հերթական ընտրություններին հաջորդում են նորերը, ժողովուրդը էլ ավելի ուժգնությամբ է հիասթափվում իշխանությունից, բայց իշխանությունները մնում են նույն աթոռին, իսկ ընդդիմությունը պատրաստվում է հաջորդ ընտրություններին։