«Առաջին լրատվական»-ի զրուցակիցն է ՀԱԿ խմբակցության պատգամավոր Լյուդմիլա Սարգսյանը
– Տիկին Սարգսյան, Դաշնակցություն կուսակցությունը դուրս չի եկել քառյակից, բայց մյուս ուժերի հետ խոր տարաձայնություններ ունի: ՀՅԴ-ից բավականին սուր քննադատություններ են հնչում քառյակի մյուս երեք ուժերի հասցեին, և հակառակը: Կարո՞ղ ենք ասել, որ քառյակից ՀՅԴ-ի դուրս գալն արդեն անխուսափելի է:
– Ոչ, չենք կարող նման եզրակացության գալ, քանի որ կան շատ ընդհանուր շահեր, նաև համագործակցություն, որն իրականացվում է Ազգային ժողովում: Տվյալ դեպքում դա արդյունավետ համագործակցություն է եղել: Եվ եթե այս պահին ՀՅԴ-ն ինչ-որ խնդիրներ ունի եռյակի հետ, որը չի կարողանում լուծել, ուղղակի պետք է նրան ժամանակ տալ: Այսօր շատ հստակ հերքել կամ հաստատել չենք կարող, որովհետև ժամանակն այդ հարցերի պատասխանը կտա: Իհարկե, ինչ-որ տրամադրություններ տեսանելի են, բայց ես չեմ ուզում տրամադրությունների հիման վրա եզրակացություն անել:
– ՀՅԴ բյուրոյի ներկայացուցիչ Հրանտ Մարգարյանը, մի քանի օր առաջ հեռուստաընկերություններից մեկին տված հարցազրույցում նկատի ունենալով եռյակին, ասաց, թե նրանք վախենում են, որ սահմանադրական փոփոխությունների հետ կապված ՀՅԴ-ի փաթեթն իշխանությունները կընդունեն, և լավ բան կլինի: Եվ որ «իրենք չեն կարող գոտկատեղից վեր բարձրանալ»:
– Երբեք հիացած եմ եղել Հրանտ Մարգարյանով և նրա բառապաշարով, որը շատ դեպքերում շատ կոպիտ է հնչում: Ես կաշխատեմ այդ դաշտը չմտնել, այդ ոճի մեջ չլինել: Երևի թե ժամանակն է այդպիսին ՀՅԴ-ի համար, որովհետև այդ կուսակցության նկատմամբ մեղադրանքը հնչում է ոչ միայն քաղաքական ուժերի կողմից, այլև այդ կուսակցության նկատմամբ հանրային կարծիք է ձևավորվում, և իրենք այս փուլում, բնականաբար, այդ կարծիքը փարատելու և ավելի ինքնավստահ դառնալու խնդիր ունեն: Հավանաբար, այդ խնդիրն են լուծում: Բայց ես լավատես եմ, կարծում եմ, որ իվերջո ինչ-որ բան պիտի փոխվի երկրում, և ՀՅԴ-ն ևս կցանկանա մասնակիցը լինել այդ փոփոխություններին: Հատկապես որ ԱԺ-ում մեզ հետ արդյունավետ աշխատել են:
– Հ.Մարգարյանը նաև այսպիսի կարծիք հայտնեց, թե եռյակը դժվար թե վարչապետի հրաժարականը պահանջի, այդ պատճառով էլ թիրախ է ընտրել սահմանադրական փոփոխությունները:
– Ես դա տրամաբանական մեկնաբանություն չեմ համարում, որովհետև կոնկրետ ՀԱԿ-ը միշտ է դեմ եղել նման կարգի փոփոխություններին, կառավարման համակարգի փոփոխությանը հատկապես: Իսկ հիմա այնքան տեսանելի է, թե ինչի համար են նախաձեռնված այս սահմանադրական «բարեփոխումները»: Ես կարծում եմ, որ դա իրենք էլ են տեսնում, պարզապես հիմա հավանաբար հարմար է դա չտեսնելը:
– Ինչի՞ համար է հարմար:
– Դա արդեն ժամանակը ցույց կտա, ես դա որպես վերջնագիր չեմ ասում: Եվ քանի որ փոխհրաձգություն կա, նրանք փորձում են ինչ-որ կերպ պաշտպանվել: Կարծում եմ՝ այնքան տեսանելի է, թե ինչի համար են նախաձեռնված սահմանադրական փոփոխությունները: Մի հիմնական խնդիր է լուծվում՝ Սերժ Սարգսյանի վերարտադրության խնդիրը: Եվ դա տեսնում են ոչ միայն քաղաքական ուժերը, այլև բոլոր քաղաքականացված քաղաքացիները: Եվ դա ոչ թե քարոզչության արդյունքում են տեսնում, այլ այս իշխանության ամբողջ ժամանակահատվածը արդեն իսկ ապացուցել է, որ նրանց հիմնական խնդիրը սեփական իշխանության պահպանումն է, որն այսօր կարծես թե Ս.Սարգսյանի համար մի փոքր ավարտին մոտենալու շրջանում է: Նա իր երկրորդ նախագահության շրջանում է, և եթե հիմա ինչ-որ բան չնախաձեռնի, հավանաբար կկորցնի և՛ թիմը, և՛ դիրքերը: Հետևաբար նա խնդիր ունի ցույց տալու, որ ես դեռ կամ, ես դեռ շարունակելու եմ լինել, և բարի եղեք իմ շուրջը համախմբված մնալ, քանի որ հետագայում կունենաք խնդիրներ: Այդ խնդիրն է լուծվում:
– Քառյակի կամ եռյակի մյուս ուժերը համաձա՞յն են իշխանափոխության, թե՞ այդ հարցը առայժմ միայն ՀԱԿ-ն է քննարկում:
– Ես կարծում եմ, որ նրանք համակարծիք են մեզ հետ, իսկ եթե դա չի բարձրաձայնվում, դա էլ ինչ-որ տեղ մարտավարական խնդիրներ է լուծում: Ես կարծում եմ, որ հարթակում հոկտեմբերի 10-ին դա շատ ավելի տեսանելի կլինի, որովհետև ՀԱԿ-ն այդ մասին հայտարարել է:«Ժառանգությունը»նույնպես կարծես թե շատ վճռական տրամադրությունների մեջ է: Նույն տրամադրություններն ինձ համար տեսանելի են «Բարգավաճ Հայաստան»կուսակցությունում:
– Այսինքն՝ հոկտեմբերի 10-ին հարթակում իշխանափոխության պահանջ կհնչի՞:
– Չեմ բացառում: Ամեն դեպքում, մեր պահանջները պիտի միասնական լինեն:
– Իսկ հոկտեմբերի 10-ից հետո հնարավո՞ր է հանրահավաքների շարք կամ շուրջօրյա հանրահավաքներ անցկացնեք:
– Ոչինչ չբացառենք: Տրամադրություններ կան, որովհետև մեր վճռականությունը դրան է բերում: Իսկ եթե մենք վճռական ենք տրամադրված, ուրեմն հանրահավաքային շարք պիտի լինի: Մնացած քայլերը հետագայում տեսանելի կլինեն: Խնդիրներ լուծելու նպատակ է դրվել, ուրեմն, կարծում եմ, դա շարք է լինելու:
