Արաբական մի շարք երկրների աջակցությամբ ԱՄՆ ավիահարվածների արդյունքում Սիրիայում երեքշաբթի գիշերը ոչնչացվել են «Իսլամական պետություն» ահաբեկչական խմբավորման մի քանի տասնյակ գրոհայիններ: Այս մասին հայտնում է Reuters-ը՝ հղում անելով Մարդու իրավունքների պաշտպանության մոնիթորինգի սիրիական կենտրոնին (Syrian Observatory for Human Rights):
«Կան տասնյակ վիրավորներ ու զոհվածներ»,- գործակալությանն ասել է կազմակերպության ղեկավար Ռամի Աբդուլռահմանը:
Ավելի վաղ հաղորդվում էր, որ Սիրիայի Ռաքա քաղաքի շրջանում ԱՄՆ-ը և մի շարք արաբական երկրներ ավիահարվածներ են հասցրել «Իսլամական պետության» դիրքերին:
ԱՄՆ հեռուստաալիքները, հղում անելով ամերիկացի պաշտոնյաների, հայտնում են, որ հարվածների է ենթարկվել գրոհայինների մոտ 20 թիրախ: Հարվածների համար ԱՄՆ-ը օգտագործել է Rockwell B-1 ռազմավարական ռմբակոծիչներ, F-16s և F-18s կործանիչներ, MQ-1 Predator անօդաչու թռչող սարքեր, Tomahawk թևավոր հրթիռներ: Associated Press-ը, հղում անելով ԱՄՆ պաշտոնատար անձանց, տեղեկացնում է, որ ավիահարվածներին ԱՄՆ-ի հետ մասնակցում է արաբական 5 երկիր՝ Հորդանանը, Բահրեյնը, Կատարը, Սաուդյան Արաբիան և ԱՄԷ-ն:
