Կանդագարում 16 խաղաղ բնակչի գնդակահարած ամերիկյան սերժանտին մահապատիժ է սպառնում։
Ռազմական դատախազ Ռոբ Սթիլի կարծիքով՝ բացահայտ դաժանությունը նրա մեղավորությունն ապացուցող բավարար հիմք է: Նրա գործով լսումների առաջին օրը դեռ հայտնի չէ:
Փաստաբանը ավելի վաղ հայտարարել էր, որ սերժանտի մեղքն ապացուցելը շատ դժվար կլինի` ֆիզիկական ապացույցների (ինչպիսիք են օրինակ մատնահետքերը) բացակայությամբ: Նրա պնդմամբ՝ զինծառայողն իբր թե չի հիշում, թե ինչպես է հանցագործությունը կատարել: Սակայն հիշում է դրանից առաջ և հետո տեղի ունեցած իրադարձությունները: Պաշտպանի խոսքերով՝ հանցագործություն կատարելու պահին զինծառայողի հոգեվիճակը գլխավոր հարցերից մեկն է:
Սերժանտը, ով զինվորական ծառայության էր անցել 2001 թ. սեպտեմբերի 11-ի ահաբեկչությունից հետո, 2003-2010 թթ. ընթացքում Իրաքում 3 անգամ ծառայության էր եղել, որտեղ կանտուզիա և թեթև վնասվածքներ էր ստացել և Աֆղանստան մեկնել չէր ցանկացել:
Նրա կնոջն ու 2 անչափահաս երեխաներին տեղափոխել են ԱՄՆ հյուսիսարևմտյան հատվածում գտնվող ռազմական բազա: Իշխանությունները ընտանիքի անդամներին պաշտպանություն են տրամադրել` մտավախություն ունենալով, որ նրանց վրա հարձակում կիրականացվի: «Թալիբան» խմբավորումը հայտարարել է Աֆղանստանում խաղաղ բնակչության սպանության համար վրեժխնդիր լինելու մտադրության մասին:
