Ո՛չ Եվրոպական միությունը, ո՛չ Մաքսային միությունը մեզ համար նպաստավոր չեն, չարիք են, բայց մենք ստիպված ենք չարյաց փոքրագույնը ընտրել: Լրագրողների հետ հանդիպմանը այս կարծիքը հայտնեց «Սպառողների ասոցիացիա» ՀԿ նախագահ Արմեն Պողոսյանը՝ հիշելով նաև դասականներից մեկի ասածը՝ «ոչ ոք մեզ չի սիրում, բացի քրեական հետախուզությունից, որը նույնպես մեզ չի սիրում»:
Ըստ նրա՝ երկու միությունների պարագայում էր թանկացումներն անխուսափելի են: Օրինակ՝ Մաքսային միությունը որակապես ցածր է, բայց մենք դատապարտված ենք, քանի որ մեր ապրանքաշրջանառությունը կապված է ՌԴ շուկայի հետ: Ըստ նրա՝ երկու պարագայում էլ մեզ մոտ խնդիրներ շատ կլինեն, քանի որ մենք հավասար մրցակցային պայմաններ չենք կարողանում ապահովել, ուստի շղթայական ռեակցիայով էլ գալիս են թանկացումները: ՀԿ նախագահի խոսքով՝ կան նորմալ և կրիմինալ գներ: «Օրինակ՝ շաքարավազի գնի մեջ կրիմինալ ենք տեսնում, բացի դրանից՝ արտոնյալ է: Մթերումը չի կազմակերպվում, գյուղացին արտադրում է, իրացումը չի լինում, կամ տանում են իրենց ուզած գնով, մրցակցային մթերում չկա. տուժեց սպառողը, գյուղացին, էլ չասեմ ոռոգման ջրի խնդրի մասին»,- կարծիք հայտնեց Արմեն Պողոսյանը:
Նա նկատեց նաև, որ ավելի շատ գնաճ ենք արձանագրել, քան տնտեսական աճն է: Նախորդ տարի գնաճը շուրջ 5 տոկոս էր, որը ընդհանուր թիվ է, քանի որ միայն սնունդը թանկացել է տասնչորս տոկոսով: Եվ «թանկացումները դեռ շարունակվում են, հուսանք՝ այս ցուցանիշը չի անցնի»:
Այնինչ մեզ մոտ միայն շուրջ 12 տոկոս կազմող խավ կա, որի համար թանկացումները ոչ մի ազդեցություն չեն ունենա, իսկ 88 տոկոսի համար թանկացումները շոշափելի կլինեն: Կարևոր է հաշվի առնել նաև այն, որ ՄՄ մտնելուց հետո կունենանք շուրջ 11 տոկոս, այսինքն՝ գնաճը կկրկնապատկվի:
Ըստ ՀԿ նախագահի՝ գնաճի վրա ազդեցություն ունի նաև էլեկտրաէներգիայի թանկացումը, այնինչ մեր հաղթաթուղթը հենց Էներգիան է, այսինքն՝ թանկացման մեջ կրիմինալ տարրեր կան:
