Դոնեցկի և Լուգանսկի մարզերի շարունակվող գնդակոծությունը, ինչպես նաև բյուրոկրատական սահմանափակումները խանգարում են բնակչությանը մարդասիրական օգնություն հատկացնելուն, որը տուժել է Ուկրաինայի արևելքի հակամարտությունից: Այս մասին գրում է ITAR-TASS-ը` վկայակոչելով մարդասիրական հարցերով կոորդինացման ՄԱԿ-ի վարչության հաշվետվությունը:
«Ամեն օր հաղորդագրություններ են ստացվոմ հրադադարի ռեժիմի խախտման մասին, իսկ Դոնեցկի և Լուգանսկի մարզերի շարունակվող գնդակոծությունը նախկինի պես խոչընդոտում է հասանելիությանը, հանգեցնում տեղափոխվող անձանց աճին և սպառնալիքի տակ դնում օգնության կարիք ունեցող խաղաղ բնակիչներին»,- ասվում է փաստաթղթում:
Նշվում է, որ դեռևս օգոստոսի 14-ին ՄԱԿ-ի հայտարարած՝ Ուկրաինային օգնություն ցուցաբերելու նախագիծը ընդամենը 14 տոկոսով է ֆինանսավորվել: Սեպտեմբերի 19-ի դրությամբ` դոնորները ներդրել են միայն 4.5 մլն դոլար:
Հակամարտության ժամանակ Դոնեցկում և Լուգանսկում վնասվել է մոտ 2000 օբյեկտ, այդ թվում` 659 հասարակական շենք, 1230 մասնավոր տուն և 178 գրասենյակ: Ենթակառուցվածքների կրած ընդհանուր վնասը կազմում է 440 մլն դոլար:
