ԱԺ ՀՀԿ-ական պատգամավոր Մանվել Բադեյանը և ԲՀԿ-ական պատգամավոր Լյովա Խաչատրյանը դատապարտեցին օրեր առաջ համացանցում հայտնված աղմկահարույց ձայնագրությունը:
Լրագրողների հետ հանդիպման ժամանակ հանրապետական պատգամավոր Մանվել Բադեյանն ասաց, որ մասնավոր խոսակցության գաղտնի ձայնագրումը նողկալի, խիստ դատապարտելի, քրեորեն հետապնդելի արարք է: Պատգամավորն իր վստահությունը հայտնեց, որ իշխանությունը ձեռնամուխ կլինի հանցագործին հայտնաբերելու գործին:
Բանախոսը բացառեց, որ մեղադրանքները անվտանգության ծառայության հասցեին հիմք ունեն: «Այդ ծառայությունն իրավունք ունի գաղտնալսում անելու դատարանի թույլտվությամբ։ Մի կառույց, որն օրենք է պահպանում, չի կարող օրենք խախտել, և երկրորդը՝ տրամաբանություն չեմ տեսնում դրա մեջ, որովհետև սա խփում է բոլոր քաղաքական ուժերին, նաև իշխանությանը, քանի որ այս գործի կատարողը նպատակ է ունեցել վարկաբեկելու նաև իշխանությանը, որովհետև այդ ուղղությամբ կգնար քննադատությունը, մինչդեռ այդպիսի բան կարող է անել ցանկացած քաղաքացի, ով հեռախոս ունի: Այստեղ իշխանությունը պետք է հայտնաբերի այդ անողին և օրենքի ողջ խստությամբ պատժի»,- կարծիք հայտնեց Մանվել Բադեյանը:
Համատեղ ասուլիսի ընթացքում իր կարծիքը հայտնեց նաև Լյովա Խաչատրյանը, որը դա պետական դավաճանություն որակեց: «Ես կուզեի, որ այդ չորս անձնավորություններին հրավիրեինք, և եթե ողջագուրվեինք, կցանկանայի նրանց ճանաչեիք տարվա լավագույն հայ»,- նկատեց նա:
Անդրադառնալով նախագահական ընտրություններին՝ հանրապետական պատգամավորն ասաց, որ Հանրապետական կուսակցության ռազմավարությունը չի փոխվել. պետք է ամեն ինչ անել ընտրողի քվեն ստանալու համար: «Ցանկացած քաղաքական ուժերի ներկայացուցիչներ կարող են առաջադրվել և չառաջադրվել: Մենք մեր խնդիրը լուծում ենք»,- ասաց նա:
Լյովա Խաչատրյանը նախընտրեց այս հարցին չանդրադառնալ՝ ասելով, որ ԲՀԿ հայտարարությունն ամեն ինչ ասել է:
