Սկանդալային հայտարարված Օսկանյան-Զուրաբյան գաղտնալսման ֆոնին լրատվամիջոցների ուշադրությունը շեղվեց ՀՀԿ համագումարում Սերժ Սարգսյանի ելույթից: Երեկ փորձեցինք պարզել, թե ինչպես են այն ընկալել գործարար պատգամավորները: «Առաջին լրատվական»-ը զրուցեց «Կիլիկիա» գարեջրի գործարանի սեփականատեր Հակոբ Հակոբյանի հետ, ով մինչև վերջերս անկախ պատգամավոր էր և մի քանի ամիս առաջ անդամագրվեց Հանրապետական կուսակցությանը:
– Պարոն Հակոբյան, Սերժ Սարգսյանը, ելույթ ունենալով ՀՀԿ համագումարում, հնչեցրեց նոր կարգախոսը՝ «Առաջ դեպի ապահով Հայաստան»: Ձեր կարծիքով՝ այսուհետ Ձեր բիզնեսն ավելի՞ ապահով կլինի Հայաստանում:
– Նախ սկսենք ելույթից: Շատ լավ ելույթ էր, ամեն ինչ հաշվի առած: Իսկապես յուրաքանչյուրս, ինձանից սկսած, պետք է մեր տեղում ճիշտ գործ անենք մեր երկրի, հող ու ջրի, ժողովրդի համար` անկախ, թե մենք որ կուսակցության անդամ ենք կամ կուսակցության անդամ չենք: Ինչ վերաբերում է մեր բիզնեսին, էն բիզնեսին, որտեղ ես սեփականատեր եմ, աշխատել ենք և՛ կոմունիստների ժամանակ, և՛ գորբաչովյան ժամանակահատվածում, և՛ Լևով Տեր-Պետրոսյանի ժամանակ, և՛ Ռոբերտ Քոչարյանի ժամանակ, և՛ հիմա աշխատում ենք Սերժ Սարգսյանի ժամանակ: Եվ Աստծո կամքով, եթե առողջ լինենք, կաշխատենք նաև 2018 թվից հետո, կաշխատենք նաև հաջորդ նախագահի ժամանակ:
– Այս ընտրություններում արդեն գիտե՞ք ով է նախագահը լինելու, որ 2018 թվականի մասին եք խոսում:
– Ես չգիտեմ՝ ով է լինելու, բայց համոզված եմ, որ մեր ժողովուրդը Սերժ Սարգսյանին է ընտրելու` միայն նրա համար, որ 5 տարի արդեն աշխատում է և կիսատ թողած շատ աշխատանքներ կան: Եվ իմ ցանկությունն է, որ ինքը ավարտի, որովհետև կիսատ չի կարելի թողնել: Կիսատ թողած մարդու աշխատանքը չի կարելի գնահատել:
– Եթե գործերը կիսատ են մնացել, միգուցե դա ոչ թե ժամանակի, այլ կարողությա՞ն խնդիր է:
– Կարողության մասով՝ կներեք, ես համաձայն չեմ ձեզ հետ: Երկար ժամանակ է իրեն ճանաչում ենք, թե՛ որպես ոչ նախագահ, թե՛ որպես նախագահ շփվել ենք և կարողությունների մասով ես որևէ կասկած չունեմ:
– Թերևս կասկած ունեն այն մարդիկ, ովքեր արտագաղթում են, ովքեր դժգոհ են, Ձեր պես բիզնես չունեն:
– Չթվա, որ ես ասում եմ՝ ամեն ինչ լավ է: Իհարկե, մեր երկրում, ցավոք սրտի, շատ վատ բաներ կան, այսօր երկրում ձևավորված է անվստահության մթնոլորտ: Իմ կարծիքով՝ մեր իշխանության, ինչու չէ` նաև ընդդիմության խնդիրն է, որ մենք պետք է հաղթահարենք ժողովրդի մեջ այդ անվստահությունը: Որ մարդկանց միջից դուրս գա անվստահությունը, հակառակ դեպքում հաջողության չենք հասնի՝ ով ուզում է լինի նախագահ:
– Իսկ ինչպե՞ս եք գնահատում, օրինակ, որ Սերժ Սարգսյանը մի կողմից համագումարում խոսում է արդար Հայաստանի մասին, մյուս կողմից` ընդդիմադիր գործիչները գաղտնալսվում են Հայաստանում:
– Ես չգիտեմ՝ դա գաղտնալսում է, թե` չէ: Կարող է իրենցից մեկը գաղտնալսել է և գցել է էդ կայքում: Չէ՞ որ, եթե իշխանությունն է գաղտնալսել, ցույց կտար, որ ինքն է գաղտնալսել: Չեմ կարծում:
– Միգուցե իշխանության կողմից կոնկրետ մադկանց վարկաբեկելու համար է դա արվել:
– Եկեք չխորանանք: Ես, օրինակ, ամեն տեղ խոսում եմ էն բաները, ինչ բոլորի հետ կարող եմ խոսել: …Եթե իշխանությունն է արել, իմ կարծիքով, ցանկացած երկրում, ցանկացած իշխանություն գաղտնալսում իրականացնում է: Երկրի անվտանգության խնդիր գոյություն ունի, որը պարտավոր են համապատասխան մարմինները պահպանել: Իսկ եթե նրանք նման բաներ չանեն, ոնց կարող են երկրի անվտանգությունը պահպանել:
– Այսինքն` կարծում եք գաղտնալսելը նորմա՞լ է:
– Ես չեմ ասում նորմալ է, ես չեմ կարծում, որ իշխանությունն է դա արել:
– Պարոն Հակոբյան, Դուք մինչ վերջերս անկախ պատգամավոր էիք ու անկախ գործարար: Ի՞նչն էր պատճառը, որ հանրապետական դարձաք: Ապահովություն գտա՞ք ՀՀԿ-ին անդամակցելով:
– Ինչ վերաբերում է ապահովությանը, ես` որպես հայ մարդ, սկսած կոմունիստական ժամանակաշրջանից երբեք կրիշա ման չեմ եկել և դրա կարիքը երբեք չեմ ունեցել և հիմա էլ չունեմ:
– Այդ դեպքում ինչո՞ւ դարձաք հանրապետական:
– Հարցեր կար: Ես հինգ տարի եղա անկախ պատգամավոր, իմ ընտրատարածքը բավական վատ ապրող, Ադրբեջանի հետ երկար սահման ունեցող տարածք է: Էդտեղ շատ խնդիրներ կան, որ պետք է իշխանությունների հետ ակտիվ համագործակցեի, որ կարողանայի արդյունքի հասնեի: Դրա համար անդամակցեցի ՀՀԿ-ին:
– Ասել է թե՝ առանց ՀՀԿ-ին անդամակցելու հնարավոր չէ՞ր այդ խնդիրները լուծել:
– Առանց անդամակցելու մի քիչ ավելի դժվար էր:
