Թուրքական Zaman թերթի փոխանցմամբ, «Քրդստանի աշխատավորական» կուսակցությունը (PKK) Լիբանանում զբաղվել է Իսրայելի օգտին լրտեսական գործունեություն ծավալելով:
Լիբանանի Ռազմական հետախուզական կազմակերպության աշխատակիցների կողմից Բուրժ Էլ-Բարաժնեհում իրականացված գործողությունների արդյունքում ձերբակալվել են PKK 3 զինյալներ, որոնք խոստովանել են, որ Իսրայելի օգտին լրտեսական գործունեություն են ծավալել:
Նշվում է, որ քուրդ զինյալները Լիբանան էին ներթափանցել Նովրուզի տոնակատարությանը մասնակցելու պատրվակով և զբաղված էին ժողովրդին «ոտքի հանելու» աշխատանքներ տանելով:
Թուրքական թերթն անմիջապես հիշեցնում է Հյուսիսային Իրաքում բազավորված PKK առաջնորդներից Մուրաթ Քարայըլանի հետևյալ խոսքերը. «Իսրայելի թշնամիները մեր թշնամիներն են»:
Հիշեցնենք, որ հունվարի սկզբներին Իսրայելում լույս տեսավ քուրդ-իսրայելական հարաբերություններին նվիրված մի հոդված, ուր նշված էր. «Այժմ, երբ Իրաքի կառավարությունն անուժ վիճակում է, իսկ իրաքյան քրդերը հռչակել են եթե ոչ իրենց ինքնիշխանությունը, ապա գոնե ինքնավարությունը, Իսրայելը պետք է առավել բաց խաղա քրդական հարցում: Եթե Իսրայելն աջակցի Հյուսիսային Իրաքի քրդերին, ապա դրանով իսկ սպառնալիք կներկայացնի քրդական ստվար բնակչություն ունեցող Թուրքիային, Իրանին, Սիրիային ու Իրաքին: Եվ դա Իսրայելին միայն օգուտ կբերի, ոչ մի բացասական տարր չկա դրանում: Նավթի վիթխարի պաշարներ ունեցող Իրաքյան Քրդստանն անմիջապես կվերածվի աշխարհի ամենահարուստ երկրներից մեկին և կհանդիսանա Իսրայելի հուսալի գործընկերը: Իրաքյան Քրդստանը պատմական հնարավորություն է Իսրայելի համար, և դրանից չօգտվելը կհամարվի հանցագործություն»:
