Տարածաշրջանային հետազոտությունների կենտրոնը (ՏՀԿ), Հայաստանում Մեծ Բրիտանիայի դեսպանատան աջակցությամբ, անցկացրեց հանրային քննարկում՝ նվիրված վերջերս կայացած ՆԱՏՕ-ի գագաթնաժողովին՝ Հայաստանի և Հարավային Կովկասի վրա դրա ազդեցության շեշտադրմամբ։ Միջոցառմանը ելույթներով հանդես եկան Հայաստանում Մեծ Բրիտանիայի դեսպան Քեթի Լիչը, Վրաստանում ՆԱՏՕ-ի ներկայացուցչական գրասենյակի ղեկավար Ուիլիամ Լահյուն, ՀՀ Ազգային ժողովի պաշտպանության, ազգային անվտանգության և ներքին գործերի մշտական հանձնաժողովի նախագահ Կորյուն Նահապետյանը, ՏՀԿ ավագ փորձագետ Դավիթ Շահնազարյանը և ՏՀԿ տնօրեն Ռիչարդ Կիրակոսյանը։
ՏՀԿ ավագ փորձագետ Դավիթ Շահնազարյանը բարձր գնահատեց գագաթնաժողովի կարևորությունը: Նա ընդգծեց, որ Միացյալ Նահանգները վերադառնում է Եվրոպա անվտանգության ապահովման առումով և առաջին հերթին՝ բալթյան տարածաշրջան, ինչի խոսուն վկայություն է ԱՄՆ նախագահի այցը բալթյան երկրներ ՆԱՏՕ-ի գագաթնաժողովի նախօրեին և հանդիպումներն այդտեղ ու ծրագրերը: «Հիմնական խնդիրներից մեկը Ռուսաստանի նոր քաղաքականությունն է, որն ուղղված է վերանայելու գոյություն ունեցող եվրոպական անվտանգության համակարգը, ինչու ոչ՝ վերադարձ դեպի ԽՍՀՄ փլուզման արդյունքները կասկածի տակ դնելու վիճակին»,- նկատեց Դավիթ Շահնազարյանը: Վերջինս ասաց, որ գտնվում ենք շատ լուրջ աշխարհաքաղաքական փոփոխությունների շեմին:
«Պատժամիջոցները վստահ եմ, որ խստացվելու են, վստահ եմ, որ ՆԱՏՕ-ում անվտանգություն ապահովող երկրների թիվը մեծանալու է, սպառողների թիվը՝ փոքրանալու: Եկեք հույս հայտնենք, որ Հայաստանի ոչ միայն իշխանությունները, այլև իշխանության բոլոր թևերը, ինչպես նաև ոչ իշխանական կառույցները, քաղաքացիական հասարակությունը, փորձագիտական շրջանակները նույնպես կլծվեն այս գործին, որպեսզի իսկապես Հայաստանը կարողանա դիմակայել և կորուստներ չունենա այս նոր աշխարհաքաղաքական լրջագույն փոփոխություններից առաջ»,-ասաց վերլուծաբանը: Նա չափազանց կարևոր որակեց Հայաստանի բարձր մակարդակով մասնակցությունը գագաթնաժողովին: Ըստ նրա՝ վերջ դրվեց այն բացասական պրակտիկային, որ Հայաստանը բարձր մակարդակով ներկայացված չի եղել նախորդ երկու՝ Լիսաբոնի և Չիկագոյի գագաթնաժողովներում:
«Ես ուրախ եմ, որ Հայաստանի հարաբերությունները ՆԱՏՕ-ի հետ ոչ միայն պահպանվում են, այլև զարգացման և ընդլայնման միտումներ ունեն: Սա դրական է: Պարզ ասեմ, որ այս քայլով Հայաստանը ցույց տվեց, որ ի վիճակի է ինքնուրույն քայլեր կատարելու, քայլեր, որոնք, մեղմ ասած, Մոսկվային այնքան էլ դուր չեն գա»,- ասաց Շահնազարյանը:
Առաջարկում ենք ելույթին ամբողջությամբ ծանոթանալ տեսանյութի միջոցով:
