«Դո՛ւրս մեր գրպանից» նախաձեռնությունը այսօր կրկին ակցիա էր իրականացնում, շեշտվում էր հատկապես կարմիր գծերի հարցը:
Նախաձեռնության անդամները ավտոմեքենաներով շուրջ 30 րոպե առանց վճարելու ցուցադրաբար կանգնեցին կարմիր գծերի տարածքում: Ակցիան մեկնարկեց Մերգելյան ինստիտուտի մոտից և ավարտվեց Դավիթաշենի 4-րդ թաղամասում ՝ կարմիր գծերի վրա:
«Առաջին լրատվական»-ի հետ զրույցում այս նախաձեռնության անդամ Վարդան Հակոբյանը ասաց, որ այս կերպ փորձում են ապացուցել, որ կարմիր գծերի համար վճարելը ինքնանպատակ է.
«Հարկ չէ՝ տուրք էլ չի կարող լինել, քանի որ տուրքը վճարվում է որոշակի ծառայության դիմաց: Սա ևս մեկ պատճառ է, թե ինչու պետք է չվճարենք կայանատեղիների կարմիր գծանշումների համար: Կես ժամ է՝ կանգնած ենք, ոչ տեսախցիկ կա, ոչ էլ «Փարկինգ Սիթիի» աշխատակիցներ, որոնք կարձանագրեն»,- ասաց նա՝ քաղաքացիներին կոչ անելով չվճարել կարմիր գծերի համար, ինչպես բազմաթիվ վարորդներ արդեն իսկ անում են՝ քաղաքապետարանին և այդ ընկերությանը ապացուցելով, որ նրանց գործողությունները իրավաչափ չեն:
Վարդան Հակոբյանը նաև նկատեց, որ իրենց օրակարգի հիմնական խնդիրը կրկին մնում է տեսախցիկների և արագաչափ սարքերի ֆիքսած տուգանքների համաներման հարցը:
Նախաձեռնության անդամները նաև նկատեցին, որ իրենց պահանջները չկատարելու դեպքում կգնան քաղաքացիական անհնազանդության ճանապարհով:
Առավել մանրամասն՝ տեսանյութում:
