Հայաստանի երեխաների հիմնադրամի (COAF)՝ անցած շաբաթ Նյու Յորքում կազմակերպած հավաքում հնարավոր եղավ հավաքել 1.3 մլն դոլար, որը տրամադրվելու է Հայաստանի գյուղական շրջաններում ապրող երեխաների կարիքները հոգալուն։ Այս մասին հաղորդում է Լոս Անջելեսում հրապարակվող «Ասպարէզ» թերթը։ Հավաքված գումարը 16 միլիոնի է հասցնում 2004-ից ի վեր այս հիմնադրամի հանգանակած գումարները: Հիմնադրամի ատենապետը դոկտոր Կարո Արմենն է:
Հավաքի ընթացքում հիմնադրամի «Մարդասիրական մրցանակ»-ով մեծարվեցին դերասաններ Նեյթոն Լեյն ու Էնդրիա Մարթին (վերջինս նաև միջոցառման հանդիսավարն էր): «Փրկիր սերունդը» մրցանակին արժանացան Երևանում ԹՈՒՄՕ ստեղծագործական կենտրոնի հովանավորներ, տեր և տիկին Սեմ և Սիլվա Սիմոնյանները:
Հայաստանի երեխաների հիմնադրամը իր գործունեությունը կենտրոնացրել է Հայաստանի Արմավիր մարզի գյուղերում։ Այն իրականացնում է տնտեսական, կրթական, առողջապահական և երեխաների ու նրանց ընտանիքների համար մի շարք հատուկ ծրագրեր:
Հիմնադրամը ունի նաև ամսաթերթ ու կազմակերպում է մշակութային և սոցիալական միջոցառումներ։