«Օդիլ» փոթորիկը, որը նախօրեին Սաֆիր-Սիմփսոնի սանդղակով ունեցել է վտանգավորության 4-րդ աստիճան, հարվածել է Մեքսիկայի արևմտյան ափերին: Այս մասին հայտնում է Ria Novosti-ն՝ հղում անելով ԱՄՆ Փոթորիկների նախազգուշացման ազգային կենտրոնին (NHC):
Անձրևներով ու ամպրոպներով ուղեկցվող ցիկլոնը երկուշաբթի օրն անցնում է Ներքին Կալիֆոռնիայի հարավային մասով: Մոտենալով ցամաքին՝ փոթորիկը թուլացել է մինչև 3-րդ աստիճան, էպիկենտրոնում քամու ուժգնությունը հասնում է մինչև 200 կմ/ժ արագության: Սպասվում է, որ «Օդիլը» կանցնի նահանգի մեծ մասով՝ մոտ 27 կմ/ժ արագությամբ շարժվելով հյուսիսային և հյուսիսարևմտյան ուղղությամբ:
Ավելի վաղ հաղորդվում էր, որ Ներքին Կալիֆոռնիա նահանգի մերձափնյա քաղաքներում հայտարարվել է փոթորկի նախազգուշացում: Հնարավոր զոհերի կամ ավերածությունների մասին օպերատիվ տեղեկություն չի ստացվել:
