Apple ընկերությունը սկսել է նոր iPhone 6 և iPhone 6 Plus-ի առցանց նախնական պատվերների ընդունումն «առաջին ալիքի» երկրներում, և որոշ մոդելների սպասելու ժամկետն արդեն վաճառքի պաշտոնական մեկնարկի ամսաթվից տեղափոխվել է 3-4 շաբաթով: Այս մասին հայտնի է դառնում Apple Store կայքից:
Նախնական պատվերների առաջին օրվա ընթացքում որոշ մոդելների առաքման ժամկետները մի քանի շաբաթով հետաձգվել են: ԱՄՆ-ում արծաթագույն կամ ոսկեգույն կորպուսով, օպերատորի պայմանագրով iPhone 6-ին անհրաժեշտ կլինի սպասել 7-10 աշխատանքային օր, առաքման նույն ժամկետն է առաջարկվում նաև նույն գույների, առանց պայմանագրի և 16 GB հիշողությամբ սմարթֆոնի դեպքում: Սպառողները նաև պետք է 7-10 օր սպասեն առանց պայմանագրի մուգ մոխրագույն iPhone 6-ի բոլոր մոդիֆիկացիաները ստանալու համար:
Եվրոպայում ևս նման իրավիճակ է. Մեծ Բրիտանիայում 16 և 128 GB հիշողություններով, բոլոր գույնի կորպուսներով iPhone 6 մոդելներին նախնական պատվերով անհրաժեշտ է սպասել 7-10 աշխատանքային օր, իսկ 64 GB տարբերակին՝ 3-4 շաբաթ: iPhone 6 Plus-ի բոլոր տարբերակների դեպքում պետք է 3-4 շաբաթ սպասել:
