Չինաստանում պետական CCTV-6 հեռուստաալիքը դեկտեմբերի 14-ին ցուցադրել է «V նշանակում է վենդետա» ֆիլմը, որի գլխավոր հերոսը համաքաղաքացիներին պայքարի է հանում տոտալիտար ռեժիմի դեմ: Այս մասին հաղորդում է The Hollywood Reporter-ը:
Երբ ֆիլմը սկսեց ցուցադրվել տարբեր երկրներում, Չինաստանում այն արգելվեց: «V նշանակում է վենդետա»–ի և նրա հետ կապված ցանկացած լուրի վրա արգելք էր դրվել իշխանությունների կողմից: Այնուամենայնիվ, Չինաստանում ֆիլմը ընդհատակյա լսարան ուներ։
Ֆիլմի ցուցադրությունը CCTV-6-ի եթերում՝ շատերն ընդունեցին որպես լիբերալ փոփոխությունների սկիզբ: Տեղի բլոգերները վստահություն են հայտնել, որ ցուցադրության թույլտվությունն իշխանություններից է եկել:
Այդ ֆիլմը պատմում է ոչ միայն պետական հեղաշրջման մասին, այլ նաև ընդդիմադիր շարժմանը նվիրել է Գայ Ֆոքսի հայտնի դիմակը, որը կիրառում են ընդդիմադիր ակտիվիստներն ամբողջ աշխարհով մեկ, այդ թվում՝ նաև Չինաստանում: Բլոգերները վստահ են, որ հեռուստատեսության ղեկավարությունն ինքնուրույն նման համարձակ քայլի գնալ չէր կարող:
Մասնավորապես, հեղափոխական պրեմիերան կապում են Սի Ցզինպինի իշխանության գալու հետ, ով հոկտեմբերին փոխարինեց Հու Ցզինտաոյին:
Ջեյսմ Մակգիգի «V նշանակում է վենդետա» ֆիլմը նկարահանվել է 2006 թ.՝ Ալան Մուրի նույնանուն գրքի հիման վրա: Ֆիլմի V անունով գլխավոր հերոսը պայքարում է Մեծ Բրիտանիայում հաստատված դիկտատուրայի դեմ: Նա իր դեմքը փակում է միջնադարյան անգլիացի հեղափոխական Գայ Ֆոքսի դիմակով: Ֆիլմը ավարտվում է խորհրդարանական շենքի պայթեցմամբ և դիկտատուրայի տապալմամբ:
Գայ Ֆոքսի դիմակը դարձել է նաև Anonymous միջազգային հաքերային խմբավորման խորհրդանիշը:
