«Առաջին լրատվական»-ի զրուցակիցն է ԱԺ ՀԱԿ խմբակցության պատգամավոր Լյուդմիլա Սարգսյանը:
– Տիկին Սարգսյան, ինչո՞ւ եք դեմ սահմանադրական փոփոխություններին և ինչո՞ւ եք կարծում, որ այդ փոփոխություններով Սերժ Սարգսյանը կվերականգնի իր իշխանությունը:
– Մենք միշտ կողմ ենք եղել կիսանախագահական կառավարման համակարգին՝ համարելով, որ մեր երկիրը շրջապատված է թշնամիներով, պատերազմող երկիր ենք: Եվ այս իրավիճակում ամենաարդյունավետ կառավարման համակարգը կիսանախագահական, կիսախորհրդարանական համակարգն է: Իսկ այս դեպքում ակնհայտ է, թե ինչ է կատարվում: Ս. Սարգսյանը արտաքուստ դեմ լինելով խորհրդարանական կառավարման համակարգին, որի մասին հայտարարեց՝ կուլիսներում այլ հրահանգ է իջեցնում:
– Չե՞ք հավատում, որ նա դեմ է խորհրդարանական համակարգին և կողմ է գործող համակարգին:
– Իսկ Հայաստանում կա՞ մեկը, ով հավատում է, որ նա անկեղծ է: Ով չգիտի, որ սահմանադրական, այսպես կոչված, բարեփոխումների ողջ փաթեթը համաձայնեցված է Ս. Սարգսյանի հետ:
– Բայց իշխանությունն ի՞նչ մեխանիզմներով պետք է վերարտադրվի: Չէ՞ որ Ս. Սարգսյանը հայտարարել է, որ խորհրդարանական կառավարման համակարգի դեպքում չի ցանկանա վարչապետ դառնալ, իսկ գործող Սահմանադրությունը նրան թույլ չի տալիս անընդմեջ երրորդ անգամ առաջադրվել որպես նախագահի թեկնածու:
– Բայց դեռ չի հայտարարել, որ չի ցանկանում դառնալ Ազգային ժողովի նախագահ: Չբացառենք, որ դա ինքն արդեն իր համար նախատեսել է նոր սահմանադրությամբ: Եվ լինելով կուսակցության առաջին դեմք՝ նա գրեթե գենսեկի կարգավիճակ է ունենալու: Նախ խորհրդարանական ընտրություններին Ազգային ժողովում պիտի մեծամասնություն ապահովի, որից հետո արդեն նա նշանակում է և նախագահին, և վարչապետին ու դառնում է ամբողջ երկրի տերն ու տիրականը, ինչպես հիմա է: Այսինքն` նա այդ բարեփոխումներին գնում է միայն և միայն իր սեփական շահերից ելնելով:
– Այսինքն` լինելով ԱԺ նախագահ և նշանակելով Հայաստանի նախագահ ու վարչապետ՝ Ս. Սարգսյանն իշխանությունը նորից իր ձեռքո՞ւմ է պահում:
– Միանշանակ: Քանի որ նորից որպես նախագահ առաջադրվելու հնարավորություն չունի, իսկ նա ավելի քիչ չի ցանկանա, կցանկանա միայն ու միայն առաջին դեմքով, հասկացել է, որ ինչ-որ կերպ պետք է Սահմանադրությունը հարմարեցնել սեփական անձին, ինչպես նա մեր երկրում ամեն ինչ հարմարեցնում է իր և իր թիմակիցների շահերին: Սահմանադրությունը կատակ չէ, որ տարին մեկ կամ հինգ տարին մեկ նման փոփոխությունների ենթարկվի: Եվ Սահմանադրությունը չէ պատճառը, որ մեր երկրում օրենքը չի գործում: Այ, երբ կդառնանք իրավական երկիր, երբ ժողովուրդը կառավարման համակարգի փոփոխության պահանջ կտեսնի, այդ ժամանակ՝ բարի, երկու ձեռքով կողմ կլինենք:
– Ըստ երևույթին նույն նկատառումներով էլ սահմանադրական փոփոխություններին դեմ են քառյակի մյուս երկու անդամները՝ «Բարգավաճ Հայաստան» և «Ժառանգություն» կուսակցությունները: Սակայն քառյակից Դաշնակցությունը կարծես թե կողմ է այդ փոփոխություններին: Այդպիսով քառյակի համատեղ պայքարը չի՞ թուլանում:
– Չեմ կարծում, որ քառյակի պայքարն այդպիսով կարող է թուլանալ: Վերջին հաշվով հիշո՞ւմ եք, ժամանակին ԲՀԿ-ն էլ էր կողմ սահմանադրական բարեփոխումներին, բայց երբ հասկացան, թե Ս. Սարգսյանն իրականում ինչ է ուզում անել, նրանք սկսեցին դեմ արտահայտվել այդ փոփոխություններին: Իսկ ՀՅԴ-ն ինչպես նախկինում կողմ է եղել խորհրդարանական կառավարման համակարգին, հիմա էլ մնում է նույն տեսակետին: Դա խոչընդոտ չէ մեր համագործակցության համար, բայց ես չեմ էլ բացառում, որ ՀՅԴ-ն կարող է ետ կանգնել իր այդ կարծիքից, քանի որ սահմանադրական բարեփոխումների փաթեթում իրենց կողմից արված առաջարկները, որքան ես տեղյակ եմ, հաշվի չեն առնվել: Իսկ նրանք ասել են, որ եթե իրենց առաջարկները հաշվի չեն առնի, դեմ կլինեն այդ փոփոխություններին: Այնպես որ` սպասենք, ես կարծում եմ, որ մեր եռյակն այդ թեմայի շուրջ քառյակ կդառնա:
– Ճի՞շտ են այն տեղեկությունները, որ քառյակը որոշել է իր համատեղ հանրահավաքն անցկացնել հոկտեմբերի 17-ին:
– Ես զարմանում եմ, որ նման կարծիքներ են շրջանառվում, որովհետև ինքս հոկտեմբերի 17-ի մասին ոչինչ չեմ լսել: Եվ վերջնական օրը դեռ համաձայնեցված չէ քառյակի հետ:
– Իսկ քառյակի պայքարը չի՞ թուլանում այն պատճառով, որ ԲՀԿ-ն և ՀՅԴ-ն ավելի արմատական փոփոխություններ՝ իշխանափոխություն կամ հրաժարականներ չեն պահանջում:
– Այդ ամենը հետագա գործընթացի մեջ շատ ավելի տեսանելի կդառնա: Մտահոգված չեմ, որովհետև ես գիտեմ կարծիքները, նրանք նույն չափով մտահոգված են մեր երկրի խնդիրներով: Եվ դա հանրահավաքի ընթացքը ցույց կտա: Իսկ ով ասաց, թե պարտադիր է, որ նախօրոք հայտարարեն: Միգուցե չեն հայտարարում, բայց նույն տրամադրությունների մեջ են:
– Այսինքն` այդ երկու կուսակցություննե՞րն էլ ձեզ հետ միասին կպահանջեն Ս. Սարգսյանի կամ վարչապետի հրաժարականները:
– Չեմ բացառում, ավելի ճիշտ՝ ակնկալում եմ:
