«Որոտանի» գործարքը դեռևս բանակցությունների փուլում է: Բանակցությունները ՀՀ կառավարության և տվյալ մասնավոր ձեռնարկության միջև են ընթանում, և մենք լիահույս ենք, որ այս գործարքը բարեհաջող ավարտին կհասցվի ի գոհունակություն երկու կողմերի»,- այսօր Թմրամիջոցների ապօրինի շրջանառության վերաբերյալ տարածաշրջանային կոնֆերանսից հետո լրագրողների հետ ճեպազրույցում ասաց ՀՀ-ում ԱՄՆ դեսպան Ջոն Հեֆերնը:
Հիշեցնենք, որ անցած տարվա նոյեմբերին հայ-ամերիկյան կառավարական հանձնաժողովի նիստի արդյունքներով որոշում կայացվեց «Որոտան կասկադ ՀԷԿ» ՓԲԸ-ն ամերիկյան «Քոնթուր գլոբալ հիդրոկասկադ» ընկերությանը վաճառելու մասին: Գործարքի գին նշվեց 180 մլն դոլարը:
Լրագրողների խնդրանքով դեսպանն անդրադարձավ նաև ԱՄՆ նախագահ Բարաք Օբամայի որոշմանը՝ «Իսլամական պետության» դեմ նոր պայքար սկսելու վերաբերյալ: «Ես պատասխանատու եմ ՀՀ-ի հետ ԱՄՆ-ի հարաբերությունների համար, և այդ հարցերով բավականին զբաղված եմ: Չէի ուզենա այլ պետությունների և տարածաշրջանների վերաբերյալ հայտարարություններ անել և այդ հարցերով փորձագետ չեմ»,- ասաց Հեֆերնը՝ հավելելով, որ այդ հարցը քննարկել է Սերժ Սարգսյանի հետ, իսկ Վաշինգտոնը քաջատեղյակ է այնտեղ հայկական փոքրամասնության և քրիստոնյա փոքրամասնությունների խնդիրներին:
Անդրադառնալով կոնֆերանսին՝ դեսպանն ընդգծեց, որ սա շատ կարևոր համաժողով է, որը խորհրդանշում է Հայաստանի հետ ԱՄՆ-ի համագործակցության լայն շրջանակը մասնավորապես դատաիրավական ոլորտում: «Այս տարվա սկզբին թմրադեղերի առգրավումները ցույց տվեցին, թե ինչպես է միջազգային համագործակցությունը օգնում նման լուրջ հանցագործություններից և ծանր ռիսկերից ժողովուրդներին պաշտպանելու գործում: Եվ այս խորհրդաժողովի նպատակն է խորացնել այդ համագործակցությունը, փորձի փոխանակմամբ կատարելագործել նման հանցագործությունների դեմ պայքարը և դրանց քրեական հետապնդումը»,- նկատեց Հայաստանում ԱՄՆ դեսպանը:
