Microsoft ընկերությունը կանադական Nortel հեռահաղորդակցման ընկերությունից գնել է IPv4 ֆորմատի մոտ 666 հազար IP հասցեներ, որը մինչ այդ հայտարարել է սնանկության մասին: Ընկերությունում հայտարարել են, որ գործարքի գինը կազմել է 7.5 մլն դոլար:
Այս գործարքը կայացած կհամարվի միայն այն դեպքում, երբ Դելավեր նահանգի դատարանը հաստատի այն, քանի որ Nortel ընկերությունը հիմա գտնվում է սնանկացման գործընթացում: Եթե այն հաստատվի, ապա յուրաքանչյուր հասցեն Microsoft-ին կարժենա 11.25 դոլար:
Microsoft-ն այս քայլին դիմել է այն բանից հետո, երբ IP հասցեների տրամադրումը կարգավորող ICANN ընկերությունը փետրվարին հայտարարել էր, որ ավարտվել է IPv4 ֆորմատի IP հասցեների տրամադրումը, քանի որ դրանք սպառվել են: Թեպետ ընկերությունում հայտարարել են, որ պատրաստվում են արդեն տրամադրել նոր IPv6 IP հասցեներ: Դրա առանձնահատկությունն այն է, որ IPv6 ֆորմատի հասցեները լինելու են ավելի երկար` 128 բիտանոց, IPv4-ի 32 բիտի փոխարեն:
Հայտնի է, որ աշխարհում տրամադրվել է IPv4 ֆորմատի մոտ 4.3 մլրդ IP հասցեներ: