Ռուսաստանի ներխուժումը Դոնբասի տարածք կոչված է ոչ միայն ապակայունացնելու Ուկրաինան, այլև պառակտելու ՆԱՏՕ-ն և ցույց տալու, որ արևմտյան ուժերի միավորումն անիմաստ է: Այս մասին գրում է Washington Post-ը:
Պարբերականը նշում է, որ ԱՄՆ-ը և ԵՄ-ն պետք է ամեն ինչ անեն, որպեսզի Վլադիմիր Պուտինը ցանկալին չստանա: Սակայն առայժմ Բրյուսելն ու Վաշինգտոնը գործում են հենց իրենց դեմ:
Պարբերականը հիշեցնում է, որ ԵՄ երկրները պատժամիջոցների նոր փաթեթը վերջերս են հաստատել:
«Բայց անմիջապես որոշեցին սառեցնել նոր սահմանափակումների իրագործումը: Այս թույլ արձագանքն էլ հենց այն է, ինչի վրա հույսը դնում է Պուտինը»,- գրում է պարբերականը:
Ըստ պարբերականի՝ Վաշինգտոնի և Բրյուսելի վճռական քայլերը կկարողանան Պուտինին զրկել կայսերական հավակնություններից ու նրան կստիպեն նահանջել:
«Բայց եթե Արևմուտքը չկարողանա հանդես գալ միասնական ճակատով, պետք չէ զարմանալ, որ հետո Պուտինը իր հարձակումը շարունակի էներգետիկ դաշտում»,- գրում է պարբերականը:
