ՀՅԴ Հայ դատի գրասենյակի ղեկավար, քաղաքական հարցերի պատասխանատու Կիրո Մանոյանը դրական է գնահատում Ուելսում նախագահներ Սարգսյանի և Ալիևի հանդիպումը՝ ԱՄՆ պետքարտուղար Քերիի մասնակցությամբ:
Այսօր լրագրողների հետ հանդիպմանը նա կարծիք հայտնեց, որ այդ հանդիպումը ինչ-որ տեղ Միացյալ Նահանգների շահագրգռվածության արդյունքն էր: Սակայն նա չի կարծում, թե բանակցությունների վրա դա ուղղակի ազդեցություն կունենա՝ այն իմաստով, որ Ադրբեջանը իր կեցվածքը կփոխի:
«Պարզ է, որ բանակցությունները հիմնականում առաջ չեն շարժվում Ադրբեջանի կեցվածքի պատճառով: Ամեն դեպքում միջնորդ պետություններն այնպես են անում, որ պատերազմի հավանականությունը պակասի»,-ընդգծեց Մանոյանը:
Նա անդրադարձավ նաև արտգործնախարար Նալբանդյանի մասնակցությանը Թուրքիայի նախագահի երդմնակալության արարողությանը՝ ասելով. «Տպավորություն կա, որ ուզում են հայ-թուրքական արձանագրությունները վերակենդանացնել, ուստի մենք այդ մասնակցությունը ողջունելի համարել չենք կարող»:
Ինչ վերաբերում է Հունաստանի խորհրդարանի կողմից Հայոց ցեղասպանության ժխտումը քրեականացնող օրինագծի ընդունմանը, Կիրո Մանոյանն ասաց, որ դա, անշուշտ, ողջունելի է, բայց պետք է հետևել և տեսնել, թե ինչ է որոշելու Մարդու իրավունքների եվրոպական դատարանը. «Այս օրենքը հիմնականում նույն մոտեցումն ունի, ինչ Շվեյցարիայի օրենքը՝ այս դեպքում Մարդու իրավունքների եվրոպական դատարանը առայժմ հայտարարել է, որ խոսքի ազատության կաշկանդում կա այդտեղ: Կարևոր է, որ այդ որոշումը ի վերջո ճիշտ որոշում լինի, և որ հանկարծ չհամարվի խոսքի ազատության կաշկանդում: Հատկապես այս մթնոլորտում նման որոշում կայացնելը շատ ողջունելի է»:
Բանախոսի կարծիքով՝ հնարավոր է, որ սրան հաջորդեն Թուրքիայի քայլերը, սակայն վերջինս դժվարացավ նշել, թե ինչ քայլեր կարող են լինել:
Ինչ վերաբերում է ՆԱՏՕ-ի գագաթնաժողովի ընթացքում ընդունված հռչակագրին, Կիրո Մանոյանն ասաց. «Դա նոր չէ: ՆԱՏՕ-ի կողմից նման մոտեցում եղել է նաև նախկինում՝ Խորհրդային Միության մի շարք երկրների տարածքային ամբողջականության մասին, բայց նույն հայտարարության հաջորդ պարբերությունում ասվում է, որ կոչ են անում Հարավային Կովկասում և այլ տարածաշրջաններում հակամարտությունները կարգավորել այն սկզբունքներով, որ նախանշված են: Ավելի լավ կլիներ, եթե մյուս սկզբունքներն էլ նշվեին, բայց դրանք մյուս հակամարտությունների համար ճշտված չեն, դրա համար էլ չեն նշվել»:
Լուսանկարը` PAN Photo-ի
