Լևոն Տեր-Պետրոսյանն ու Գագիկ Ծառուկյանը Սերժ Սարգսյանի ՀՀԿ խորհրդի նիստի ելույթին, փաստորեն, պատասխանեցին իրենց հանդիպումով, որը տեղի է ունեցել ԲՀԿ-ի հարկի տակ: Սա ինքնին հետաքրքրական փաստ է, որ արդեն երրորդ անգամ Լևոն Տեր-Պետրոսյանն է գնում Գագիկ Ծառուկյանի դուռը, և ոչ մի հանդիպում Տեր-Պետրոսյանի հարկի տակ չի անցել: Ըստ էության, սրանից զատ` հետաքրքիր որևէ բան հանդիպման ընթացքում երևի թե չի էլ եղել:
Համատեղ մամլո հաղորդագրության մեջ, որ տարածել են ՀԱԿԿ-ն ու ԲՀԿ-ն, նշվում է, որ քննարկվել են քառյակի համագործակցության արդյունքները և համատեղ հանրահավաքի անելիքները, նաև որոշվել է, որ այցեր կլինեն մարզեր:
Ակնհայտ է, որ Տեր-Պետրոսյանն ու Ծառուկյանը սրանով, ըստ էության, որոշել են մկաններ ցույց տալ մկանների վարժանք կատարած Սերժ Սարգսյանին: Սարգսյանը ՀՀԿ-ին էր հանել գրոհի, Տեր-Պետրոսյանն ու Ծառուկյանն էլ, ըստ էության, հայտարարում են, որ ընդունում են մարտահրավերն ու պատրաստ են գրոհը դիմագրավելու, համենայնդեպս հայտարարում են, որ չեն նահանջելու համատեղ հանրահավաքից:
Սակայն խնդիրն այն է, որ այս անգամ հանրահավաքը կարծեք թե չունի թեմատիկ առանցք: Այսինքն` եթե ապրիլին հայտարարված հանրահավաքին կար նպատակը՝ կառավարության հրաժարականի պահանջ, ապա այս անգամ արդեն նպատակի լուրջ խնդիր կա, եթե իհարկե` որպես նպատակ չի ընտրվի հայտնի 12 կետերից մեկնումեկը կամ նման մի նոր կետ: Ի վերջո, Հայաստանում, օրինակի համար, բազում գյուղեր կան, որ ջուր չունեն, և այդ գյուղերի ջրամատակարարման հարցը կարող է դառնալ քառյակի համատեղ հանրահավաքի նպատակը կամ առանցքային թեման:
Խնդիրն այն է, որ այլ լուրջ նպատակ կարծեք թե չի նախանշվում: Քառյակը կառավարության հրաժարական, բնականաբար, չի պահանջի, քանի որ այստեղ Գագիկ Ծառուկյանի խնամին է՝ Հովիկ Աբրահամյանը, իսկ Սերժ Սարգսյանի հրաժարականը պահանջելուց էլ խուսափում է ԲՀԿ-ն: Իրավիճակը կարող էին փրկել սահմանադրական փոփոխությունները, սակայն սա թեմատիկ առանցք դարձնելու դեպքում էլ դուրս է մնում ՀՅԴ-ն, որը փոփոխություններին դեմ չի արտահայտվում և դեմ չէ խորհրդարանական կառավարման մոդելի անցնելուն, գոնե առայժմ:
Սրան զուգահեռ` «Ժառանգությունը» հայտարարել է, որ եթե չի դրվելու ամբողջական իշխանափոխության հարց, ապա ամեն ինչ դառնում է անիմաստ: Զուգահեռաբար` քառյակի հարաբերություններում չի կարող որևէ նշանակություն ունեցած չլինել և այն, որ Գագիկ Ծառուկյանի հեռուստատեսությունը ցուցադրում էր Ռոբերտ Քոչարյանի քաղաքական գովազդը: Սրան զուգահեռ` Տեր-Պետրոսյանը իր վերջին հարցազրույցում մտավախություն էր հայտնել սահմանադրական փոփոխությունների հարցում ԲՀԿ-ի մերժողական դիրքի հաստատակամության կապակցությամբ, այսինքն` ըստ էության, որոշակի անվստահություն հայտնել, որ ԲՀԿ-ն, ի վերջո, չի համագործակցի Սերժ Սարգսյանի հետ:
Այս ֆոնին Տեր-Պետրոսյան-Ծառուկյան հանդիպումը թվում է, թե ավելի շատ հարաբերությունների պարզաբանման համար կարող էր լինել, քան համատեղ պլանների հստակեցման: Թեև հարաբերությունների տեսանկյունից էլ երևի թե, ըստ էության, բավական խոսուն է այն փաստը, որ արդեն երրորդ անգամ հանդիպումը լինում է Ծառուկյանի հարկի տակ, այն Ծառուկյանի, որին, ի դեպ, 2008-ին ՀԱԿ-ը մեղադրում էր Մարտի 1-ին մասնակից օլիգարխներից մեկը լինելու համար, և առ այսօր կարծեք թե պաշտոնապես հրապարակավ չեն հրաժարվել այդ մեղադրանքից կամ չեն հերքել դա:
